കർണാടക ഉപതെരഞ്ഞെടുപ്പ്; വോട്ടെണ്ണൽ ആരംഭിച്ചു; ആദ്യ ലീഡ് ബിജെപിക്ക്

കർണാടക ഉപതെരഞ്ഞെടുപ്പിൽ വോട്ടെണ്ണൽ ആരംഭിച്ചു. ബിജെപിയാണ് നിലവിൽ മുന്നേറുന്നത്. 11 കേന്ദ്രങ്ങളിലാണ് വോട്ടെണ്ണൽ നടക്കുന്നത്. 15 നിയമസഭാമണ്ഡലങ്ങളിലാണ് ഉപതെരഞ്ഞെടുപ്പ് നടന്നത്. ഭരണം തുടരാൻ ബിജെപിക്ക് വേണ്ടത് ആറ് സീറ്റുകളാണ്.

കൂറുമാറി പാർട്ടിയിൽ എത്തിയവരാണ് ജനവിധി തേടിയത്. കോൺഗ്രസ് ജെഡിഎസ് സഖ്യത്തിലെ 16 എംഎൽഎമാരെ കൂറുമാറ്റി നേടിയ ഭരണം, ഉപതെരഞ്ഞെടുപ്പിൽ വിജയം നേടാനായില്ലെങ്കിൽ ബിജെപിക്ക് നഷ്ടമാകും. ഡിസംബർ അഞ്ചിനായിരുന്നു ഉപതെരഞ്ഞെടുപ്പ്. കോടികളെറിഞ്ഞുള്ള പ്രചരണമാണ് ഉപതെരഞ്ഞെടുപ്പിൽ എല്ലാപാർട്ടികളും നടത്തിയത്.

കോൺഗ്രസിനായി മുൻ മുഖ്യമന്ത്രി സിദ്ധാരാമയ്യയുടെയും ഡി.കെ ശിവകുമാറിന്റെയും നേതൃത്വത്തിലായിരുന്നു പ്രധാന പ്രചാരണം. കനത്ത സുരക്ഷാ സംവിധാനമാണ് ഉപതിരഞ്ഞെടുപ്പ് ഫലം വരുന്ന പശ്ചാത്തലത്തിൽ സംസ്ഥാനത്ത് ഒരുക്കിയിട്ടുള്ളത്.

Story Highlights -Karnataka Bypol, bjp