വളാഞ്ചേരി വട്ടപ്പാറ വളവില്‍ നിയന്ത്രണംവിട്ട ഗ്യാസ് ടാങ്കര്‍ മറിഞ്ഞു

മലപ്പുറം വളാഞ്ചേരി വട്ടപ്പാറ വളവില്‍ നിയന്ത്രണംവിട്ട ഗ്യാസ് ടാങ്കര്‍ മറിഞ്ഞു. അപകടത്തില്‍ ഡ്രൈവര്‍ക്ക് സാരമായി പരുക്കേറ്റു. ഇയാളെ ആശുപത്രിയില്‍ പ്രവേശിപ്പിച്ചു. രാത്രി 9.30 ഓടെയായിരുന്നു സംഭവം. മംഗലാപുരത്ത് നിന്ന് പാചക വാതകവുമായി കൊച്ചിയിലേക്ക് പോവുകയായിരുന്ന ഗ്യാസ് ടാങ്കറാണ് അപകടത്തില്‍പ്പെട്ടത്.

ടാങ്കറിന് ചോര്‍ച്ചയില്ലെന്നാണ് പൊലീസ് നല്‍കുന്ന വിവരം. ഈ വഴിയിലൂടെയുള്ള ഗതാഗതം താത്കാലികമായി നിര്‍ത്തിവച്ചിരിക്കുകയാണ്. ടാങ്കറിന് ലീക്കുണ്ടെന്ന് പ്രദേശവാസികള്‍ സംശയം പ്രകടിപ്പിച്ചതിനെ തുടര്‍ന്ന് രണ്ട് യൂണിറ്റ് ഫയര്‍ഫോഴ്‌സ് സ്ഥലത്ത് എത്തിയിട്ടുണ്ട്. സ്ഥിരമായി അപകടം ഉണ്ടാകുന്ന ഒരു മേഖലയാണിത്. കഴിഞ്ഞ മാസവും സമാനമായ രീതിയില്‍ ഇവിടെ ടാങ്കര്‍ ലോറി മറിഞ്ഞിരുന്നു.