‘കുട്ടിക്കളി’ക്ക് നാളെ തുടക്കം; ഇന്ത്യ ഞായറാഴ്ച ഇറങ്ങും

അണ്ടർ-19 ലോകകപ്പിന് നാളെ തുടക്കം. ദക്ഷിണാഫ്രിക്കയിൽ നടക്കുന്ന ടൂർണമെൻ്റിൻ്റെ ഉദ്ഘാടന മത്സരത്തിൽ ആതിഥേയർ അഫ്ഗാനിസ്ഥാൻ അണ്ടർ-19 ടീമിനെ നേരിടും. ഇന്ത്യയുടെ ആദ്യ മത്സരം വരുന്ന 19 ഞായറാഴ്ച ശ്രീലങ്കക്കെതിരെയാണ്. ഫെബ്രുവരി 9നാണ് ഫൈനൽ നടക്കുക.

നാലു ഗ്രൂപ്പുകളിലായി ആകെ 16 ടീമുകളാണ് കൗമാര ലോകകപ്പിൽ മാറ്റുരക്കുക. ജപ്പാൻ, ന്യൂസിലൻഡ്, ശ്രീലങ്ക എന്നീ ടീമുകൾക്കൊപ്പം ഗ്രൂപ്പ് എയിലാണ് ഇന്ത്യ ഉൾപ്പെട്ടിരിക്കുന്നത്. ഗ്രൂപ്പ് ബിയിൽ ഓസ്ട്രേലിയ, ഇംഗ്ലണ്ട്, വെസ്റ്റ് ഇൻഡീസ്, നൈജീരിയ എന്നീ ടീമുകളും ഗ്രൂപ്പ് സിയിൽ ബംഗ്ലാദേശ്, പാകിസ്താൻ, സ്കോട്ട്ലൻഡ്, സിംബാബ്‌വെ എന്നീ ടീമുകളും പരസ്പരം പോരടിക്കും. ഗ്രൂപ്പ് ഡിയിൽ അഫ്ഗാനിസ്ഥാൻ, കാനഡ, ദക്ഷിണാഫ്രിക്ക, യുഎഇ എന്നീ ടീമുകളാണുള്ളത്.

ജനുവരി 19, 21, 24 എന്നീ തിയതികളിലാണ് ഇന്ത്യയുടെ ഗ്രൂപ്പ് മത്സരങ്ങൾ. ഞായറാഴ്ച ശ്രീലങ്കയും 21ന് ജപ്പാനും 24നു ന്യൂസിലൻഡും ഇന്ത്യയുടെ എതിരാളികളാവും. നിലവിലെ ലോക ചാമ്പ്യന്മാരാണ് ഇന്ത്യ. പൃഥ്വി ഷാ, ശുഭ്മൻ ഗിൽ, ശിവം മവി തുടങ്ങിയ താരങ്ങൾ ടി-20 ലോകകപ്പ് ടീമിൽ ഉൾപ്പെട്ടിരുന്നു. ന്യൂസിലൻഡിലെ ബേ ഓവലിൽ നടന്ന ഫൈനലിൽ ഓസ്ട്രേലിയയെ 8 വിക്കറ്റിനാണ് ഇന്ത്യ തോല്പിച്ചത്. ഫൈനലിൽ മാഞ്ജോത് കൽറ സെഞ്ചുറി നേടിയിരുന്നു.

Story Highlights: U-19 World Cup