മുസഫർപൂർ ഷെൽട്ടർ ഹോം പീഡനം; സ്ഥാപന ഉടമ ബ്രിജേഷ് താക്കൂർ അടക്കം 19 പേർ കുറ്റക്കാർ

മുസഫർപൂർ ഷെൽട്ടർ ഹോമിൽ പെൺകുട്ടികൾ പീഡനത്തിനിരയായ സംഭവത്തിൽ സ്ഥാപന ഉടമ ബ്രിജേഷ് താക്കൂർ അടക്കം 19 പേർ കുറ്റക്കാർ. കേസിൽ ഒരാളെ കോടതി കുറ്റവിമുക്തനാക്കി. കേസിൽ പ്രതികൾക്കുള്ള ശിക്ഷ ഈ മാസം 28 ന് വിധിക്കും.

തെളിവുകളുടെ അഭാവത്തിൽ മുഹമ്മദ് സാഹിൽ എന്നയാളെയാണ് കോടതി വെറുതെ വിട്ടത്. ക്രിമിനൽ ഗൂഡാലോചന, പ്രായപൂർത്തിയാകാത്ത കുട്ടികളെ ബലാത്സംഗം ചെയ്യൽ, ലൈംഗിക അതിക്രമത്തിന് വിധേയമാക്കൽ തുടങ്ങിയ കുറ്റങ്ങളാണ് ബ്രിജേഷ് താക്കൂർ അടക്കമുള്ള പ്രതികൾക്കെതിരെ ചുമത്തിയത്.

കേസിൽ എട്ടു സ്ത്രീകളും 12 പുരുഷന്മാരുമാണ് പ്രതികളായി ഉണ്ടായിരുന്നത്. കേസിൽ സാക്ഷിമൊഴികൾ വിശ്വസനീയമല്ലെന്ന പ്രതി ബ്രിജേഷ് താക്കൂറിന്റെ വാദം ജഡ്ജി സൗരഭ് കുൽശ്രേഷ്ഠ കഴിഞ്ഞ ദിവസം തള്ളിയിരുന്നു.