ഇന്ത്യ ബാറ്റ് ചെയ്യും; ന്യൂസിലൻഡ് നിരയിൽ ഒരു മാറ്റം

ന്യൂസിലൻഡിനെതിരായ മൂന്നാം ടി-20യിൽ ഇന്ത്യ ബാറ്റ് ചെയ്യും. ടോസ് നേടിയ കിവീസ് ക്യാപ്റ്റൻ കെയിൻ വില്ല്യംസൺ ഇന്ത്യയെ ബാറ്റിംഗിനയക്കുകയായിരുന്നു. ഒരു മാറ്റവുമായാണ് ന്യൂസിലൻഡ് ഇറങ്ങിയിരിക്കുന്നത്. ഇന്ത്യൻ നിരയിൽ മാറ്റമില്ല. ആദ്യ രണ്ട് മത്സരങ്ങളും വിജയിച്ച ഇന്ത്യക്ക് ഇന്നു ജയിച്ചാൽ പരമ്പര സ്വന്തമാക്കാം. ന്യൂസിലൻഡ് മണ്ണിൽ ഇതുവരെ ഒരു ടി-20 പരമ്പര സ്വന്തമാക്കാൻ ഇന്ത്യക്ക് സാധിച്ചിട്ടില്ല.

ബ്ലയർ ടിക്ക്നറിനു പകരം പേസ് ബൗളർ സ്കോട്ട് കുഗ്ഗൾജിൻ ന്യൂസിലൻഡ് നിരയിൽ കളിക്കും. ടിക്ക്നറിനെക്കാൾ ബാറ്റ് കൊണ്ട് സംഭാവന നൽകാൻ കുഗ്ഗൾജിനു സാധിക്കുമെന്നതിനാലാണ് അദേഹത്തെ ടീമിൽ ഉൾപ്പെടുത്തുന്നതെന്ന് വില്ല്യംസൺ പറഞ്ഞു.

ആദ്യ മത്സരത്തിൽ ആറു വിക്കറ്റിനാണ് ഇന്ത്യ ജയം കുറിച്ചത്. ആദ്യം ബാറ്റ് ചെയ്ത ന്യൂസിലൻഡ് നിശ്ചിത 20 ഓവറിൽ അഞ്ചു വിക്കറ്റ് നഷ്ടത്തിൽ 203 റൺസ് നേടിയപ്പോൾ ആറു പന്തുകൾ ബാക്കി നിൽക്കെ നാലു വിക്കറ്റ് നഷ്ടപ്പെടുത്തി ഇന്ത്യ വിജയിക്കുകയായിരുന്നു. ഇന്ത്യക്കായി ലോകേഷ് രാഹുലും ശ്രേയാസ് അയ്യരും അർധസെഞ്ചുറികൾ നേടി.

രണ്ടാം ടി-20 യില്‍ ഇന്ത്യ ഏഴു വിക്കറ്റിനു വിജയിച്ചു. ന്യൂസിലാന്‍ഡിന്റെ 133 എന്ന ചെറിയ വിജയലക്ഷ്യം ഇന്ത്യ 15 പന്തുകള്‍ ശേഷിക്കെ മറികടന്നു. കെഎല്‍ രാഹുലും ശ്രേയസ് അയ്യരുമാണ് ഇന്ത്യന്‍ ബാറ്റിംഗിന് കരുത്തായത്. ഓപ്പണറായി ഇറങ്ങിയ രാഹുല്‍ പുറത്താകാതെ രണ്ട് സിക്സും മൂന്ന് ബൗണ്ടറിയും ഉള്‍പ്പെടെ 50 പന്തില്‍ 57 റണ്‍സ് എടുത്തു. ജയത്തോടെ അഞ്ചു മത്സരങ്ങളടങ്ങിയ പരമ്പര 2-0 എന്ന നിലയില്‍ ഇന്ത്യ മുന്നിലെത്തി.

Story Highlights: India, New Zealand, T-20