പാല്‍ സംഭരിച്ച് തമിഴ്‌നാട്ടിലെത്തിച്ച് പാല്‍പൊടിയാക്കും: അംഗന്‍വാടി മുഖേനയും വിതരണം: മുഖ്യമന്ത്രി

സംസ്ഥാനത്ത് അധികമായി വരുന്ന പാല്‍ സംഭരിച്ച് തമിഴ്‌നാട്ടിലെ ഇ റോഡുള്ള ഫാക്ടറിയില്‍ എത്തിച്ച് പാല്‍പൊടിയാക്കുമെന്ന് മുഖ്യമന്ത്രി പിണറായി വിജയന്‍. പ്രതിദിനം അന്‍പതിനായിരം ലിറ്റര്‍ പാല്‍ വരെ ഇവിടെയെത്തിച്ച് പാല്‍പൊടിയാക്കും. ഇതിനുള്ള സൗകര്യം ഒരുക്കി നല്‍കാമെന്ന് തമിഴ്‌നാട് ക്ഷീര ഫെഡറേഷന്‍ അറിയിച്ചു. കൂടുതല്‍ പാല് സ്വീകരിക്കുന്നതിന് ശ്രമിക്കാമെന്നും തമിഴ്‌നാട് സര്‍ക്കാര്‍ ഉറപ്പ് നല്‍കിയിട്ടുണ്ടെന്ന് മുഖ്യമന്ത്രി അറിയിച്ചു. കൊവിഡ് 19 അവലോകന യോഗത്തിന് ശേഷം മാധ്യമങ്ങളെ കാണുകയായിരുന്നു മുഖ്യമന്ത്രി.

Read More: സംസ്ഥാനത്ത് ഇന്ന് കൊവിഡ് സ്ഥിരീകരിച്ചത് 24 പേര്‍ക്ക്

പാല്‍ കൂടുതലായി ജനങ്ങള്‍ വാങ്ങാന്‍ ശ്രദ്ധിച്ചാല്‍ ക്ഷീര കര്‍ഷകര്‍ക്ക് അത് വലിയ ആശ്വാസമാകും. കണ്‍സ്യൂമര്‍ ഫെഡ് ശൃംഘല വഴി പാല്‍ വിതരണം ചെയ്യും. സംസ്ഥാനത്തെ അംഗന്‍വാടി മുഖേനയും പാല്‍ വിതരണം ചെയ്യാനും അതിഥി തൊഴിലാളികള്‍ക്ക് ക്യാമ്പുകളില്‍ നല്‍കുന്നതിനും നടപടി സ്വീകരിക്കുമെന്നും മുഖ്യമന്ത്രി പറഞ്ഞു.

അതേസമയം, സംസ്ഥാനത്ത് ഇന്ന് കൊവിഡ് സ്ഥിരീകരിച്ചത് 24 പേര്‍ക്കാണ്. രോഗം സ്ഥിരീകരിച്ചവരില്‍ 12 പേര്‍ കാസര്‍ഗോഡ് സ്വദേശികളാണ്. മൂന്നുപേര്‍ എറണാകുളം സ്വദേശികളും തിരുവനന്തപുരം, തൃശൂര്‍, മലപ്പുറം, കണ്ണൂര്‍ ജില്ലകളില്‍ രണ്ട് പേര്‍ക്ക് വീതവും പാലക്കാട് ജില്ലയില്‍ ഒരാള്‍ക്കും രോഗം സ്ഥിരീകരിച്ചു. തിരുവനന്തപുരം, കോഴിക്കോട് ജില്ലകളില്‍ ഓരോരുത്തരുടെ രോഗം ഭേദമായി.

സംസ്ഥാനത്ത് 265 പേര്‍ക്കാണ് ഇതുവരെ രോഗം സ്ഥിരീകരിച്ചത്. ഇന്ന് രോഗം സ്ഥിരീകരിച്ചവരില്‍ ഒന്‍പത് പേര്‍ വിദേശത്ത് നിന്ന് വന്നവരാണ്. മറ്റുള്ളവര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. ഒരുലക്ഷത്തി അറുപത്തിനാലായിരത്തി നൂറ്റിമുപ്പത് പേരാണ് സംസ്ഥാനത്ത് ആകെ നിരീക്ഷണത്തിലുള്ളത്. ഒരുലക്ഷത്തി അറുപത്തിമൂവായിരത്തി അഞ്ഞൂറ്റി എട്ട്‌പേര്‍ വീടുകളിലും 622 പേര്‍ ആശുപത്രികളിലും നിരീക്ഷണത്തിലാണ്. ഇന്ന് മാത്രം 123 പേരെ ആശുപത്രിയില്‍ പ്രവേശിച്ചു. 7965 സാമ്പിളുകള്‍ പരിശോധനക്ക് അയച്ചതില്‍ 7256 എണ്ണം രോഗബാധയില്ലെന്ന് ഉറപ്പാക്കിയെന്നും മുഖ്യമന്ത്രി പറഞ്ഞു.

Story Highlights: coronavirus, Covid 19,