ബിഹാറിൽ സിപിഐഎം നേതാവിനെ വെടിവച്ച് കൊന്നു

സിപിഐഎം നേതാവും കർഷക നേതാവുമായ ജഗ്​ദിഷ് ചന്ദ്ര ബസുവിനെ വെടിവച്ചുകൊന്നു. ബിഹാറിലെ ഖഗാരിയ ജില്ലയിലെ അദ്ദേഹത്തി​ന്റെ ഗ്രാമത്തിലാണ്​ സംഭവം. ബൈക്കിലെത്തിയ സംഘം അദ്ദേഹത്തിന് നേരെ വെടിയുതിർത്തുകയായിരുന്നു. ആശുപത്രിയിൽ എത്തിച്ചെങ്കിലും മരണം സംഭവിച്ചു.

സിപിഐഎം ഖഗാരിയ ജില്ല സെക്രട്ടറിയേറ്റ്​ അംഗവും ആൾ ഇന്ത്യ കിസാൻ സഭ ജില്ലാ സെക്രട്ടറിയുമാണ്​ ജഗ്​ദിഷ്​. അദ്ദേഹത്തിന് നേരെ മുൻപും വധഭീഷണികളുണ്ടായിരുന്നു. ചില കൊലപാതകങ്ങളുമായി ബന്ധപ്പെട്ടവർക്കെതിരെ അദ്ദേഹം നടത്തിയ പോരാട്ടത്തെ തുടർന്നായിരുന്നു വധഭീഷണി. ഭൂപ്രഭുക്കൻമാർക്കെതിരെ നിലപാടെടുത്തതിന്റെ പേരിൽ ഭൂമാഫിയ അദ്ദേഹത്തെ  നോട്ടമിട്ടിരുന്നു എന്ന്​ കിസാൻ സഭ പുറത്തിറക്കിയ പ്രസ്​താവനയിൽ പറയുന്നു. ജഗ്​ദിഷി​ന്റെ കുടുംബത്തിന്​ ഒരു കോടി രൂപ നഷ്​ടപരിഹാരവും ആശ്രിതർക്ക്​ ജോലിയും നൽകാൻ സർക്കാർ തയ്യാറാകണമെന്നും കിസാൻ സഭ ആവശ്യപ്പെട്ടു.

കഴിഞ്ഞ രണ്ട് മാസത്തിനുള്ളില്‍ ബിഹാറില്‍ കൊല്ലപ്പെടുന്ന രണ്ടാമത്തെ സിപിഐഎം നേതാവാണ് ജഗ്​ദിഷ്​ ചന്ദ്ര ബസു. ഫെബ്രുവരി 18ന് സിപിഐഎം ബെഗുസരായി ജില്ലാ കമ്മിറ്റിയംഗം രാജീവ് ചൗധരി കൊല്ലപ്പെട്ടിരുന്നു.

Story highlights-cpim leader, shot dead in bihar