സംസ്ഥാനത്ത് കൊവിഡ് കേസുകൾ ഇനിയും കൂടും; നിർദേശങ്ങൾ കർശനമായി പാലിക്കണമെന്ന് ആരോ​ഗ്യമന്ത്രി

സംസ്​ഥാനത്ത്​ കൊവിഡ്​ കേസുകൾ ഇനിയും കൂടുമെന്ന്​ ആരോഗ്യമന്ത്രി കെ.കെ. ശൈലജ. പുറത്തുനിന്നുള്ളവർ വരുമ്പോൾ രോഗികളുടെ എണ്ണം കൂടുമെന്ന്​ അറിയാമായിരുന്നു. സംസ്​ഥാനത്ത്​ ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്നും മന്ത്രി പറഞ്ഞു.

കേരളത്തിന് പുറത്തുനിന്ന് കൂട്ടത്തോടെ ആളുകളെത്തുമ്പോൾ കാര്യങ്ങൾ ക്രോഡീകരിക്കാനും മുൻകരുതലെടുക്കാനും ബുദ്ധിമുട്ടുണ്ടാകും. സർക്കാർ സംവിധാനങ്ങളെ അറിയിക്കാതെ സംഘടനകൾ ആളുകളെ കൊണ്ടുവരുന്നത്​ അപകടകരമാണ്. നിയമപരമായ ഇടപെടൽ വേണ്ടിവരും. എന്നാൽ അത്തരത്തിലുള്ള ഇടപെടൽ ഒഴിവാക്കാൻ അവർ തന്നെയാണ്​ ശ്രമിക്കേണ്ടതെന്നും മന്ത്രി പറഞ്ഞു.

Read Also:കണ്ണൂരിൽ കൊവിഡ് ബാധിച്ച ആദിവാസി യുവതിയുടെ രണ്ടാമത്തെ പരിശോധനാഫലം നെ​ഗറ്റീവ്

ക്വാറന്റീൻ വ്യവസ്​ഥകൾ പാലിക്കാൻ എല്ലാവരും തയ്യാറാകണം. ക്വാറൻറീൻ പാലിച്ചില്ലെങ്കിൽ സ്​ഥിതി ഗുരുതരമാകും. വീട്ടിലെ നിരീക്ഷണമാണ്​ സർക്കാർ ക്വാറന്റീനേക്കാൾ നല്ലത്​. അത്​ കേന്ദ്രം അംഗീകരിച്ചത്​ നല്ല കാര്യമാണെന്നും ആരോഗ്യമന്ത്രി പറഞ്ഞു. രോഗികളുടെ എണ്ണം കൂടുന്ന സാഹചര്യം നേരിടാൻ കേരളം സജ്ജമാണ്​. പ്ലാൻ എ, പ്ലാൻ ബി, പ്ലാൻ സി എന്നിങ്ങനെ വിപുലമായ പദ്ധതിയാണ്​ ഇതിനായി തയാറാക്കിയിട്ടു​ള്ളതെന്നും മന്ത്രി കൂട്ടിച്ചേർത്തു.

Story highlights-covid case likely to increase says health minister k k shailaja