സി-ആപ്റ്റിൽ വീണ്ടും എൻഐഎ പരിശോധന; വാഹനത്തിന്റെ ജിപിഎസ് റെക്കോർഡർ പിടിച്ചെടുത്തു

തിരവനന്തപുരം വട്ടിയൂർക്കാവിലെ സി-ആപ്റ്റിൽ കൊച്ചിയിൽ നിന്നുള്ള എൻഐഎ സംഘം പരിശോധന നടത്തി. തുടർച്ചയായ രണ്ടാം ദിവസമാണ് പരിശോധന നടത്തിയത്.

സി-ആപ്റ്റിലെ വാഹനത്തിന്റെ ജിപിഎസ് റെക്കോർഡർ അന്വേഷണ സംഘം പിടിച്ചെടുത്തു. വാഹനത്തിന്റെ ഡ്രൈവർ സുരേഷിനെയും ചോദ്യം ചെയ്തു. വാഹനം ഖുർആനുമായി മലപ്പുറത്തേക്ക് പോകവേ ജിപിഎസ് പ്രവർത്തനരഹിതമായിരുന്നു. ഇതേ തുടർന്നാണ് നിലവിൽ അന്വേഷണം സംഘം ജിപിഎസ് പരിശോധനയ്ക്കായി പിടിച്ചെടുത്തത്.

ഇന്നലെ സി-ആപ്റ്റിലെ സ്റ്റോർ ഇൻ-ചാർജ് നിസാമിനെ അന്വേഷണ സംഘം ചോദ്യം ചെയ്തിരുന്നു. ഡ്രൈവർ അഗസ്റ്റിനെയും ചോദ്യം ചെയ്തിരുന്നു. ആ സമയത്ത് സി-ആപ്റ്റ് എംഡി ആയിരുന്ന അബ്ദുൽ റഹ്മാനെയും ഇന്നലെ എൻഐഎ സംഘം ചോദ്യം ചെയ്തിരുന്നു.

നിലവിൽ സി-ഡാക്കിൽ ഡിജിറ്റൽ തെളിവുകളുടെ പരിശോധന നടക്കുന്നുണ്ട്. സൈബർ ഫോറൻസിക്ക് പരിശോധന നേരത്തെ പൂർത്തിയായിരുന്നു.

Story Highlights – C-apt, NIA