അമ്മയോടൊപ്പം സ്‌കൂട്ടറിൽ സഞ്ചരിച്ച മകൻ ലോറിക്കടിയിൽപ്പെട്ട് മരിച്ചു

അമ്മയോടൊപ്പം സ്‌കൂട്ടറിൽ സഞ്ചരിച്ച മകൻ ടിപ്പർ ലോറിക്കടിയിൽപ്പെട്ട് മരിച്ചു. കോഴിക്കോട് കക്കോടി കോട്ടൂപ്പാടം അത്താഴക്കുന്നുമ്മൽ ഷാജിയുടെ മകൻ അർജുൻ (13) ആണ് മരിച്ചത്.

കോഴിക്കോട് ദേശീയപാതയിൽ കൊണ്ടോട്ടി മോയിൻകുട്ടി വൈദ്യർ അക്കാദമിക്ക് സമീപം ഇന്നലെ രാവിലെ 8.50-ഓടെയായിരുന്നു അപകടമുണ്ടായത്. അമ്മ ശ്രീദേവി (മഞ്ജു)യുടെ കൊട്ടൂക്കരയിലെ വീട്ടിലേക്ക് പോവുകയായിരുന്നു ഇരുവരും. ശ്രീദേവിയായിരുന്നു വാഹനം ഓടിച്ചിരുന്നത് കെ.എസ്.ആർ.ടി.സി. ബസിന് കടന്നുപോകാനായി വേഗം കുറച്ച് റോഡരികിലൂടെ ഓടിയ സ്‌കൂട്ടറിന്റെ പിന്നിൽ ലോറി തട്ടുകയായിരുന്നു. നിയന്ത്രണം വിട്ട സ്‌കൂട്ടറിൽ നിന്ന് ശ്രീദേവി ഇടതുവശത്തേക്കും അർജുൻ റോഡിലേക്കും തെറിച്ചുവീഴുകയുമായിരുന്നു. ലോറിയുടെ പിൻചക്രം കയറിയ അർജുൻ അപകടസ്ഥലത്ത് വച്ചുതന്നെ മരിച്ചു. പരിക്കേറ്റ ശ്രീദേവി (39)യെ കൊണ്ടോട്ടിയിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിന്റെ സിസിടിവി ദൃശ്യങ്ങൾ ലഭിച്ചിട്ടുണ്ട്. ലോറി ഡ്രൈവർക്കെതിരേ മനഃപൂർവമല്ലാത്ത നരഹത്യക്ക് കേസെടുത്തിട്ടുണ്ട്.