അസം: പക്ഷികൾ കൊവിഡ് പരത്തുമെന്ന് നഗരസഭ; മുളങ്കൂട്ടം മുറിച്ച് നീക്കി

പക്ഷികളിലൂടെ കൊവിഡ് വ്യാപിക്കുമെന്നാരോപിച്ച് മുളങ്കൂട്ടം മുറിച്ച് നീക്കി അസമിലെ നഗരസഭ. ഉദൽ‌ഗുരി ജില്ലയിലെ തങ്‌ല നഗരസഭയാണ്​ കൊവിഡ് ​ വ്യാപിപ്പിക്കുന്നുവെന്ന കാരണം ചൂണ്ടിക്കാട്ടി അഞ്ചുപേരുടെ ഉടമസ്​ഥതയിലുള്ള മുളങ്കാടുകൾ വെട്ടി വീഴ്​ത്തിയത്​. മുളകൾ വെട്ടി നീക്കുന്നതിനിടെ ഇതിൽ കൂടുക്കൂട്ടിയിരുന്ന നിരവധി കൊറ്റി പക്ഷികൾ കൊല്ലപ്പെട്ടു.

കൊറ്റികളുടെ പ്രജനന കാലമായതിനാൽ ഏതാനും ദിവസം പ്രായമുള്ള നിരവധി കുഞ്ഞുങ്ങളും അടവെച്ച്​ വിരിയാറായ നിരവധി മുട്ടകളും കൂടുകളിലുണ്ടായിരുന്നു. ഇവയെല്ലാം നിർദയം നശിപ്പിക്കപ്പെട്ടതായി നാട്ടുകാർ പറഞ്ഞു.

തങ്‌ല മുനിസിപ്പൽ കമ്മിറ്റി ജൂൺ എട്ടിന് അയച്ച കത്തിൽ സമിതിക്ക് കീഴിലുള്ള വാർഡ് നമ്പർ 1, 2 പ്രദേശങ്ങളിലെ അഞ്ച് ഭൂവുടമകൾക്ക് അവരുടെ പരിസരത്തെ മുള ചെടികൾ മുറിക്കാൻ നിർദ്ദേശം നൽകി. നിങ്ങളുടെ സ്​ഥലത്ത്​ വളരുന്ന മുളകളിൽ കൂടുണ്ടാക്കിയ പക്ഷികൾ കാഷ്​ടിച്ച് വൃത്തിഹീനമായ അന്തരീക്ഷമാണ്​ നിലവിലുള്ളത്​. ഇത് കൊവിഡ് കേസുകൾ വർധിക്കാൻ ഇടയാക്കും. അതിനാൽ, നിങ്ങളുടെ പരിസരത്തെ മുളച്ചെടികൾ മുറിച്ച് പ്രദേശത്ത് ശുചിത്വമുള്ള ജീവിതസാഹചര്യം സൃഷ്ടിക്കണമെന്ന്​ നിങ്ങളോട് ആവശ്യപ്പെടുന്നു” എന്നാണ്​ തങ്‌ല മുനിസിപ്പൽ കമ്മിറ്റി എക്സിക്യൂട്ടീവ് ഓഫിസർ ഒപ്പിട്ട കത്തിൽ പരാമർശിച്ചിരുന്നത്. അയൽക്കാർ പരാതിപ്പെട്ടതായും കത്തിൽ പറയുന്നു.

എന്നാൽ മുള വെട്ടാൻ ഭൂവുടമകൾ വിസമ്മതിച്ചതോടെ നഗരസഭ തൊഴിലാളികളെ ഏർപ്പാടാക്കി വെട്ടിനിരത്തുകയായിരുന്നു.

നൽകിയ സമയ പരിധിക്കുള്ളിൽ മുളമുറിക്കാൻ ഭൂവുടമകൾ തയാറാകാത്തതിനാലാണ്​ അധികൃതർ മുറിച്ചുനീക്കിയതെന്ന്​ തങ്‌ല പൊലീസ് സ്റ്റേഷൻ ഓഫിസർ സോമേശ്വർ കോൺവാർ പറഞ്ഞു. പക്ഷികൾ കൊല്ലപ്പെട്ടതിനെ കുറിച്ച്​ തങ്ങൾക്ക്​ കൃത്യമായ വിവരം ലഭ്യമായിട്ടില്ലെന്നും അദ്ദേഹം പറഞ്ഞു. വനംവകുപ്പ് അധികൃതരും ഇക്കാര്യത്തിൽ കൈമലർത്തി.