യു.എ.പി.എ നിലനില്‍ക്കില്ല; ജാമ്യം ആവശ്യപ്പെട്ട് സ്വപ്‌ന ഹൈക്കോടതിയില്‍

സ്വര്‍ണക്കടത്തിൽ എന്‍ ഐ എ രജിസ്റ്റര്‍ ചെയ്‌ത കേസില്‍ ജാമ്യം നല്‍കണമെന്ന് ആവശ്യപ്പെട്ട് സ്വപ്‌ന സുരേഷ് ഹൈക്കോടതിയെ സമീപിച്ചു. തനിക്കെതിരായ യു എ പി എ കേസ് നിലനില്‍ക്കില്ലെന്നും സ്വര്‍ണക്കടത്ത് കേസിലെ വിചാരണ ആരംഭിക്കുന്നത് അനന്തമായി നീളുകയാണെന്നും സ്വപ്‌ന ജാമ്യാപേക്ഷയില്‍ ചൂണ്ടിക്കാട്ടുന്നു.

ജാമ്യം നിഷേധിച്ച എന്‍ ഐ എ പ്രത്യേക കോടതി ഉത്തരവ് ചോദ്യം ചെയ്‌താണ് സ്വപ്‌നയുടെ നീക്കം. 2020 ജൂലായ് അഞ്ചിനായിരുന്നു കേരള രാഷ്ട്രീയത്തെ പിടിച്ചുകുലുക്കി നയതന്ത്ര സ്വർണ്ണ കടത്ത് കസ്റ്റംസ് പിടികൂടിയത്. കോണ്‍സുലേറ്റിലെ മുന്‍ പി ആര്‍ ഒ സരിത്ത് ആദ്യം അറസ്റ്റിലായി. സരിത്തിന്‍റെ മൊഴി സ്വപ്‌നയുടെ പങ്കിലേക്ക് അന്വേഷണമെത്തിച്ചു.