നഗരസഭ സ്പോര്ട്സ് ടീം രൂപീകരണ വിവാദം; വിശദീകരണവുമായി മേയര് ആര്യ രാജേന്ദ്രന്
തിരുവനന്തപുരം നഗരത്തിലെ കായികതാരങ്ങള്ക്കായി നഗരസഭ ഏര്പ്പെടുത്തിയ ടീമിനെച്ചൊല്ലിയുള്ള വിവാദങ്ങള്ക്ക് വിശദീകരണവുമായി മേയര് ആര്യ രാജേന്ദ്രന്. മേയറെ രൂക്ഷ ഭാഷയില് വിമര്ശിച്ച് ദളിത് ചിന്തകനും എഴുത്തുകാരനുമായ സണ്ണി എം. കപിക്കാട് രംഗത്തെത്തിയിരുന്നു. നഗരസഭയുടെ സദുദ്ദേശപരമായ തീരുമാനത്തെ തെറ്റിദ്ധാരണജനകമായി വ്യാഖ്യാനിക്കപ്പെട്ടത് ഖേദകരമാണെന്ന് മേയര് ഫേസ്ബുക്ക് കുറിപ്പില് പറഞ്ഞു.(arya rajendran reacts to corporation sports team controversy)
‘കഴിഞ്ഞ ദിവസം നഗരസഭയുടെ സ്പോര്ട്സ് ടീം രൂപീകരണവുമായി ബന്ധപ്പെട്ട് ഇട്ട പോസ്റ്റിനെ സംബന്ധിച്ച് ചില തെറ്റിദ്ധാരണകള് ഉണ്ടായതായി ശ്രദ്ധയില്പ്പെട്ടു. സദുദ്ദേശപരമായി നഗരസഭ എടുത്ത തീരുമാനത്തെ തെറ്റിദ്ധാരണജനകമായി വ്യാഖ്യാനിക്കപ്പെട്ടത് ഖേദകരമാണ്. കേരളത്തില് തന്നെ ആദ്യമായാണ് ഒരു തദ്ദേശ സ്വയംഭരണ സ്ഥാപനം പതിവ് രീതികളില് നിന്ന് മാറി ഒരു പടികൂടി മുന്നിലോട്ട് നമ്മുടെ കായിക രംഗത്തെ നയിക്കാന് ഒരു പദ്ധതി ആസൂത്രണം ചെയ്യുന്നത്. നഗരസഭയോ ഞാനോ ഉദ്ദേശിക്കാത്ത തരത്തിലാണ് വ്യാഖ്യാനങ്ങള് എന്നതിനാല് അതേ സംബന്ധിച്ച് ഒരു വിശദീകരണം ആവശ്യമാണെന്ന് തോന്നുന്നു.
തിരുവനന്തപുരം നഗരസഭ ജനകീയസൂത്രണ പദ്ധതിയില് ഉള്പ്പെടുത്തി വര്ഷങ്ങളായി കളരി (ജനറല്) കളരി (എസ് സി) എന്ന പ്രോജക്ട് ഹെഡില് ഫുട്ബോള്, വോളിബോള്, ബാസ്ക്കറ്റ് ബോള്, അത്ലറ്റിക്സ് എന്നീയിനങ്ങളില് കായിക പരിശീലനം നടപ്പിലാക്കി വരുന്നു. നഗരത്തിലെ സര്ക്കാര് എയ്ഡഡ് സ്കൂളുകളില് പഠിക്കുന്നതും കായിക അഭിരുചി ഉള്ളതുമായ വിദ്യാര്ത്ഥി വിദ്യാര്ത്ഥിനികളെ ട്രയല്സ് നടത്തിയാണ് പരിശീലനത്തിനായി തിരഞ്ഞെടുക്കുന്നത്. ഇതിലേക്കായി വാര്ഷിക പദ്ധതിയുടെ ഭാഗമായി ജനറല് ഫണ്ട് ഉപയോഗിച്ചും എസ് സി ഫണ്ട് ഉപയോഗിച്ചും പദ്ധതികള് നടപ്പിലാക്കി വരുന്നു. ഇത്തരത്തില് സര്ക്കാര് മാനദണ്ഡം അനുസരിച്ച് ജനറല് /എസി ഫണ്ടുകള് ഉപയോഗിക്കുമ്പോള് കൂടുതല് കുട്ടികള്ക്ക് അവസരം നല്കാന് സാധിക്കുന്നു എന്നതാണ് പ്രത്യേകത. ഓരോ കായിക ഇനത്തിലും ആണ്കുട്ടികളില് നിന്നും 25 പേരെയും പെണ്കുട്ടികളില് നിന്നും 25 പേരെയാണ് തിരഞ്ഞെടുക്കുന്നത് . തിരഞ്ഞെടുക്കപ്പെടുന്ന മുഴുവന് കുട്ടികള്ക്കും ഒരുമിച്ച് പരിശീലനം നല്കി ഓരോ ഇനത്തിലും നഗരസഭയുടെ ഓരോ ടീം രൂപീകരിക്കുക എന്നതാണ് ആശയം.
ഇതിന്മേല് ഇനിയും ചര്ച്ചകളും വിപുലീകരണവും ആവശ്യമാണ് എന്നും, അതിനായി നഗരത്തിലെ കായിക പ്രേമികളുമായും വിദഗ്ദരുമായും ചര്ച്ച നടത്തുമെന്നും നേരത്തെ സൂചിപ്പിച്ചിരുന്നു. അങ്ങനെ അതിവിപുലമായ ഒരു പദ്ധതിയായി ഇത് മാറുമെന്ന ആത്മവിശ്വാസമാണ് ഞങ്ങള്ക്കുള്ളത്. അത്തരം ഒരു പദ്ധതിയെ വിവാദത്തില്പ്പെടുത്തി തകര്ക്കാന് ശ്രമിക്കുന്നത് ശരിയായ നിലപാടല്ല. അതുകൊണ്ട് ഈ വിശദീകരണത്തോടെ ഈ വിവാദം അവസാനിപ്പിക്കണമെന്ന് അഭ്യര്ത്ഥിക്കുന്നു’. മേയര് പ്രതികരിച്ചു.
ജനറല് വിഭാഗം ആണ്കുട്ടികളുടെയും പെണ്കുട്ടികളുടെയും ഓരോ ടീമും, എസ്.സി/എസ്.ടി വിഭാഗത്തിലെ ആണ്കുട്ടികളുടെയും പെണ്കുട്ടികളുടെയും ഓരോ ടീമും ആണ് രൂപീകരിച്ചിരിക്കുന്നത്. ഈ തരംതിരിവിലൂടെ സ്പോര്ട്സിനെയും എസ്.സി, എസ്.ടി ജനവിഭാഗങ്ങളെയും മേയര് അപമാനിച്ചിരിക്കുകയാണെന്ന് സണ്ണി എം. കപിക്കാട് ട്വന്റിഫോറിനോട് പറഞ്ഞു. പറഞ്ഞു. വളരെ അലസമായ ജാതിബോധമാണ് മേയറെ ഭരിക്കുന്നതെന്നാണ് മനസിലാക്കുന്നത്. അത് തിരുത്താന് മേയര് ആര്യ രാജേന്ദ്രന് തയ്യാറാവണമെന്നും അദ്ദേഹം ആവശ്യപ്പെട്ടു.
Story Highlights: arya rajendran reacts to corporation sports team controversy
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here