തൊഴിൽ നഷ്ടപ്പെടുന്നവർക്കായി യു.എ.ഇ ആവിഷ്കരിച്ച​ ഇൻഷ്വറൻസ്​ പദ്ധതിയിൽ അം​ഗമായത് അറുപതിനായിരത്തിലധികം തൊഴിലാളികൾ

തൊഴിൽ നഷ്ടപ്പെടുന്നവർക്കായി യു.എ.ഇ ആവിഷ്കരിച്ച​ ഇൻഷ്വറൻസ്​ പദ്ധതിയിൽ ജനുവരി ഒന്നുമുതൽ ഇതുവരെ അറുപതിനായിരത്തിലധികം തൊഴിലാളികൾ അം​ഗമായതായി അധികൃതർ അറിയിച്ചു. പദ്ധതിയിൽ ജൂൺ 30നകം എല്ലാ ജീവനക്കാരും അം​ഗങ്ങളാവണമെന്നാണ് അധികൃതർ നിർദേശിച്ചിരിക്കുന്നത്. പ്രവാസി മലയാളികൾക്കുൾപ്പെടെ ​ഗുണകരമായ പ​ദ്ധതിയാണ് യുഎഇ നടപ്പാക്കുന്നത്. ( Insurance scheme in UAE for those who lose their jobs ).

യുഎഇയിൽ ജോലി നഷ്ടപ്പെട്ടാലും അടിസ്ഥാന ശമ്പളത്തിന്റെ അറുപത് ശതമാനം മൂന്ന് മാസം ലഭിക്കുന്നതാണ് ഇൻഷ്വറൻസ് പദ്ധതി. ഇതിൽ അം​ഗമാവാനുളള അവസരം ഈ വർഷം ജനുവരി ഒന്ന് മുതലാണ് നടപ്പാക്കിത്തുടങ്ങിയത്. രാജ്യത്തെ സ്വകാര്യ മേഖലാ ജീവനക്കാരും ഫെഡറൽ സർക്കാർ സ്ഥാപനങ്ങളിലെ ജീവനക്കാരും ഇൻഷ്വറൻസ് പദ്ധതയിൽ ചേരണം എന്ന് മാനവിഭവശേഷം സ്വദേശിവത്കരണ മന്ത്രാലയം നേരത്തെ അറിയിച്ചിരുന്നു.

Read Also: 2023 ജനുവരി മാസത്തെ ഇന്ധന വില പ്രഖ്യാപിച്ച് യു.എ.ഇ

പ​ദ്ധതിയോട് തൊഴിലാളികളുടെ ഭാ​ഗത്തുനിന്ന് നല്ല പ്രതികരണമാണ് ലഭിക്കുന്നതെന്നാണ് ഇപ്പോൾ അധികൃതർ അറിയിച്ചിരിക്കുന്നത്. പദ്ധതിയിൽ അം​ഗമാവാനുളള അവസരം ആരംഭിച്ച് ദിവസങ്ങൾക്കുളളിൽ തന്നെ 60000 അധികം ആളുകൾ പദ്ധതിയുടെ ഭാ​ഗമായിട്ടുണ്ടെന്നാണ് അധികൃതർ വ്യക്തമാക്കുന്നത്. 16,000 ദിർഹം വരെ ശമ്പളമുള്ളവർക്ക് മാസം അഞ്ച് ദിർഹം അല്ലെങ്കിൽ വർഷം 60 ദിർഹം നൽകിയാണ് പദ്ധതിയിൽ അം​ഗമാവേണ്ടത്.

ശമ്പളം 16,000 ദിർഹത്തിന് മുകളിലുളളവർ മാസം പത്ത് ദിർഹമോ വർഷം 120 ദിർഹമോ അടക്കേണ്ടിവരും. ഐ.എൽ.ഒ.ഇ യുടെ വെബ്​സൈറ്റ്​ വഴിയോ സ്മാർട്ട്​ ആപ്പ്​ വഴിയോ ഇൻഷ്വറൻസിൽ ചേരാം. ഇത്തിസാലാത്ത്​, ഡു, അൽ അൻസാരി എക്സ്​ചേഞ്ച്​, ബാങ്ക്​ എ.ടി.എമ്മുകൾ തുടങ്ങിയവ മുഖേനയും ഇൻഷ്വറൻസിൻറെ ഭാഗമാകാം. ഇതിലൂടെ പ്രീമിയം അടക്കാനും സാധിക്കും. അതേസമയം ജൂൺ 30നകം ​ പദ്ധതിയുടെ ഭാ​ഗമായില്ലെങ്കിൽ 400 ദിർഹം വീതം പിഴ അടക്കേണ്ടി വരും. ഒപ്പം പ്രീമിയം അടവിൽ വീഴ്ചവരുത്തിയാൽ 200 ദിർഹം പിഴ നൽകണമെന്നും അധികൃതർ മുന്നറിയിപ്പ് നൽകിയിട്ടുണ്ട്.

Story Highlights: Insurance scheme in UAE for those who lose their jobs