‘സ്വപ്നയുടേത് ദുരാരോപണമാണെങ്കില് അതിനെ നിയമപരമായി നേരിടുമോ?’, മുഖ്യമന്ത്രി വ്യക്തമാക്കണമെന്ന് വി ഡി സതീശന്
സ്വര്ണക്കടത്ത് കേസില് സ്വപ്ന സുരേഷ് ഫേസ് ബുക്ക് ലൈവില് ഉന്നയിച്ച ആരോപണങ്ങള്ക്ക് മറുപടി നല്കാനുള്ള ബാധ്യത മുഖ്യമന്ത്രിക്കും സിപിഐഎം സംസ്ഥാന സെക്രട്ടറി എം വി ഗോവിന്ദനുമുണ്ടെന്ന് പ്രതിപക്ഷ നേതാവ് വി ഡി സതീശന്. വിഷയം ആവശ്യമെങ്കില് സംസ്ഥാന പൊലീസ് അന്വേഷിക്കണമെന്നും ഈ ആരോപണത്തെ നിയമപരമായി നേരിടുമോ എന്ന് ഇവര് വ്യക്തമാക്കണമെന്നും പ്രതിപക്ഷ നേതാവ് ആവശ്യപ്പെട്ടു. ( v d satheeshan against pinarayi vijayan amid swapna suresh allegation in gold smuggling case)
എം.വി ഗോവിന്ദന്റെ അറിവോടെയാണ് വന്നതെന്നും മുഖ്യമന്ത്രിക്കും കുടുംബാംഗങ്ങള്ക്കും എതിരായ രേഖകള് നല്കണമെന്നും ഇടനിലക്കാരനായ വിജയ് പിള്ള ആവശ്യപ്പെടുകയും പിന്നീട് ഭീക്ഷണിപ്പെടുത്തുകയും ചെയ്തെന്നാണ് സ്വപ്ന സുരേഷിന്റെ വെളിപ്പെടുത്തല്. സംസ്ഥാന മുഖ്യമന്ത്രിക്കും ഭരണകക്ഷിക്ക് നേതൃത്വം നല്കുന്ന പാര്ട്ടിയുടെ സംസ്ഥാന സെക്രട്ടറിക്കും എതിരെ ഉന്നയിച്ചത് ദുരാരോപണമാണെങ്കില് അതിനെ നിയമപരമായി നേരിടുമോയെന്നും വ്യക്തമാക്കണമെന്നാണ് പ്രതിപക്ഷ നേതാവ് പറയുന്നത്.
സ്വര്ണക്കടത്ത് കേസ് അട്ടിമറിക്കാന് ബി.ജെ.പിക്കും സി.പി.ഐ.എമ്മിനുമിടയില് ഇടനിലക്കാരുണ്ടെന്ന ആരോപണവും വി ഡി സതീശന് ഉന്നയിച്ചു. നേരത്തെ മാധ്യമ പ്രവര്ത്തകനായ ഷാജ് കിരണിന്റെ പേരും ഉയര്ന്നുവന്നിരുന്നു. ഉന്നത പോലീസ് ഉദ്യോഗസ്ഥരുമായുള്ള ഷാജ് കിരണിന്റെ ബന്ധവും വെളിപ്പെട്ടിരുന്നു. ഈ സാഹചര്യത്തില് പുതിയ ഇടനിലക്കാരെ കുറിച്ചും അന്വേഷണം വേണമെന്നും അദ്ദേഹം കൂട്ടിച്ചേര്ത്തു.
Story Highlights: v d satheeshan against pinarayi vijayan amid swapna suresh allegation in gold smuggling case
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here