‘പോലീസ് മുഖ്യമന്ത്രിയുടെ കയ്യിലെ പാവകൾ; ട്വന്റിഫോർ റിപ്പോർട്ടർക്കെതിരായ കേസ് നീതിക്ക് നിരക്കാത്തത്’; നൂർബീന റഷീദ്

ട്വന്റിഫോർ റിപ്പോർട്ടർ വിനീത വിജിക്കെതിരായ കള്ളക്കേസ് നീതിക്ക് നിരക്കാത്തതെന്ന് വനിത ലീഗ് ദേശീയ ജനറൽ സെക്രട്ടറി നൂർബിന റഷീദ്. ഈ രീതിയിൽ മുന്നോട്ട് പോയാൽ നമ്മുടെ പൗരവകാശം പോലും സർക്കാർ ലംഘിക്കുമെന്ന് നൂർബിന റഷീദ് പറഞ്ഞു. പോലീസ് മുഖ്യമന്ത്രിയുടെ കയ്യിലെ പാവകളാണെന്ന് നൂർബിന വിമർശിച്ചു.

നവകേരള സദസിന്റെ വാഹനത്തിനെതിരെ യൂത്ത് കോൺഗ്രസ് പ്രവർത്തകർ ഷൂ എറിഞ്ഞ സംഭവം റിപ്പോർട്ട് ചെയ്തതിന് പിന്നാലെയാണ് ട്വന്റിഫോർ റിപ്പോർട്ടർ വിനീത വി.ജിക്കെതിരെ കുറുപ്പംപടി പൊലീസ് കേസെടുത്തിരിക്കുന്നത്. ഐപിസി 120(ബി) കുറ്റകരമായ ഗൂഢാലോചനയെന്ന വകുപ്പ് പ്രകാരമാണ് വിനീതയ്‌ക്കെതിരെ കേസെടുത്തിരിക്കുന്നത്.

ഗുരുതര വകുപ്പുകൾ ചുമത്തിയ പൊലീസ് ഉദ്യോഗസ്ഥനെ അന്വേഷണ വിധേയമായി സസ്‌പെൻഡ് ചെയ്യണമെന്ന് ചീഫ് എഡിറ്റർ ആർ.ശ്രീകണ്ഠൻ നായർ ആവശ്യപ്പെട്ടിരുന്നു. കേസ് നിയപരമായി തന്നെ നേരിടുമെന്നും ആർ ശ്രീകണ്ഠൻ നായർ വ്യക്തമാക്കിയിരുന്നു.

Story Highlights: Noorbeena Rasheed about case against vineetha vg