ഹ്യൂമർ റോളിൽ വീണ്ടും അഴിഞ്ഞാടാൻ ജഗദീഷ് ; പരിവാർ ട്രെയ്ലർ പുറത്ത്

ഉത്സവ് രാജീവ്, ഫഹദ് നന്ദു എന്നിവരുടെ സംവിധാനത്തിൽ ജഗദീഷ് ,ഇന്ദ്രൻസ്, പ്രശാന്ത് അലക്സാണ്ടർ, മീനരാജ്, ഭാഗ്യ, ഋഷികേശ് തുടങ്ങിയവരെ പ്രധാന കഥാപാത്രങ്ങളാക്കി ചെയ്യുന്ന ‘പരിവാർ’ എന്ന ചിത്രത്തിൻ്റെ ട്രെയിലർ റിലീസായി. മരണക്കിടക്കയിൽ കിടക്കുന്ന അച്ഛന്റെ മരണത്തിനായി കാത്തിരിക്കുന്ന അത്യാഗ്രഹികളായ മക്കളുടെ കഥയാണ് പരിവാർ. വളരെ ഗൗരവമുറിയ വിഷയത്തെ മികച്ച നർമ്മമുഹൂർത്തങ്ങളിലൂടെ രസകരമായ അനുഭവമാകുകയാണ് സംവിധായകർ.

ഏറെ നാളുകൾക്ക്ശേഷമാണ് ജഗദീഷും ഇന്ദ്രൻസും സീരിയസ് വേഷങ്ങളിൽ നിന്ന് മാറി നർമ്മത്തിന് പ്രാധാന്യം കൊടുത്തിരിക്കുന്ന വേഷങ്ങളിൽ സ്‌ക്രീനിലെത്തുന്നത്. ചിത്രത്തിന്റെ തിരക്കഥ തയാറാക്കിയിരിക്കുന്നതും ഇരട്ട സംവിധായകർ തന്നെയാണ്. സോഹൻ സീനുലാൽ, പ്രമോദ് വെളിയനാട്, ഉണ്ണി നായർ, ഷാബു പ്രൗദീൻ, ആൽവിൻ മുകുന്ദ്, വൈഷ്ണവ്, അശ്വന്ത് ലാൽ, ഹിൽഡ സാജു, ഉണ്ണിമായ നാലപ്പാടം, ഷൈനി വിജയൻ, ശോഭന വെട്ടിയാർ എന്നിവരാണ് മറ്റു പ്രമുഖ നടിനടന്മാർ.

ഫ്രാഗ്രന്റ് നേച്ചർ ഫിലിം ക്രിയേഷൻസിന്റെ ബാനറിൽ ആൻ സജീവ്, സജീവ് പി കെ എന്നിവർ നിർമ്മിക്കുന്ന ഈ ചിത്രത്തിന്റെ ഛായാഗ്രഹണം കൈകാര്യം ചെയ്യുന്നത് അൽഫാസ് ജഹാംഗീർ ആണ്. വി.എസ് വിശാൽ എഡിറ്റിങ് നിർവഹിച്ചിരിക്കുന്ന പരിവാറിൽ നിരവധി പുതുമുഖങ്ങളായ അഭിനേതാക്കളെയും കാണാം. ബിജിബാൽ ഈണമിട്ടിരിക്കുന്ന ഗാനങ്ങൾക്ക് വരികളെഴുതിയിരിക്കുന്നത് സന്തോഷ് വർമ്മയാണ്. പരിവാർ മാർച്ച് ഏഴിന് പ്രദർശനത്തിനെത്തും.

Story Highlights :Pariwar’s trailer is out now