അക്രമങ്ങൾക്കും ലഹരിക്കുമെതിരെ ട്വന്റിഫോർ; ‘SKN 40’ ജനകീയ യാത്ര തിരുവനന്തപുരത്ത് രണ്ടാംദിനം

അക്രമങ്ങൾക്കും ലഹരിക്കും എതിരെ ട്വന്റിഫോർ ചീഫ് എഡിറ്റർ ആർ ശ്രീകണ്ഠൻ നായർ നയിക്കുന്ന യാത്ര SKN 40 തിരുവനന്തപുരം ജില്ലയിൽ പര്യടനം തുടരുന്നു. വെഞ്ഞാറമൂട്ടിൽ നിന്ന് ഗുഡ് മോർണിംഗ് വിത്ത് ആർ ശ്രീകണ്ഠൻ നായർ ഷോയോട് കൂടി പര്യടനം ആരംഭിക്കും. വെഞ്ഞാറമൂട്ടിൽ വാർത്താ പ്രാധാന്യമുള്ള വ്യക്തികളും പ്രമുഖരും SKNനൊപ്പം മോർണിംഗ് ഷോയിൽ ചേരും.

രാവിലെ 11.30 ന് ടെക്നോപാർക്കിൽ യാത്ര എത്തും. ഉച്ചയ്ക്ക് ശേഷം മുതലപ്പൊഴിയിലും വർക്കല ശിവഗിരി മഠത്തിലും സന്ദർശനം നടത്തും. തുടർന്ന് വൈകിട്ട് ശാർക്കര മൈതാനത്ത് നാട്ടുകൂട്ടം.

ലഹരിവിരുദ്ധ സന്ദേശം സമൂഹത്തിന്റെ എല്ലാ തട്ടുകളിലും എത്തിക്കുക എന്നതാണ് SKN40 കേരള യാത്രയുടെ പ്രധാന ലക്ഷ്യം. കേരളത്തിൽ സിന്തറ്റിക് ലഹരി പദാർഥങ്ങൾ ഉൾപ്പെടെ വ്യാപകമാവുകയും അക്രമങ്ങൾ കൂടുകയും ചെയ്യുമ്പോൾ, പ്രതിരോധം തീർക്കേണ്ടത് നാം ഓരോരുത്തരുടെയും കടമയാണ്. അതിനുള്ള ജനകീയ സംവാദ വേദി തുറക്കുകയാണ് ട്വന്റിഫോർ.

വിവിധ മേഖലകളിലുള്ളവരുമായി നേരിട്ട് സംവദിച്ച് സമൂഹത്തെ ഗ്രസിക്കുന്ന പ്രശ്നങ്ങൾക്ക് എതിരെ ജനകീയ മുന്നേറ്റം സാധ്യമാക്കാനുള്ള ഉദ്യമമാണ് എസ്കെഎൻ40 റോഡ് ഷോ. യുവാക്കളെ കുടുക്കുന്ന അദൃശ്യമായ ലഹരി വലയുടെ കണ്ണികള്‍ കണ്ടെത്താനും നാടിനെ വിറപ്പിക്കുന്ന അക്രമങ്ങൾ ഒഴിവാക്കാനുമുള്ള ക്രിയാത്മകമായ ചര്‍ച്ചകള്‍ റോഡ് ഷോയുടെ ഭാഗമായി നടക്കും.

ലഹരിയില്‍ നിന്ന് കുട്ടികളെ തിരികെപ്പിടിക്കാന്‍ മാതാപിതാക്കളെ അണിനിരത്തി കര്‍മപരിപാടികള്‍ ആലോചിക്കും. ഈ ഉദ്യമത്തിൽ നിങ്ങൾക്കും പങ്കുചേരാം. ആർ ശ്രീകണ്ഠൻ നായരുമായി ആശയങ്ങൾ പങ്കുവെക്കാം.

Story Highlights : SKN 40 campaign 2nd day Thiruvananthapuram