രാമനവമിക്ക് പ്രയാഗ്‌രാജിൽ ദർഗയുടെ മുകളിൽ കയറി കാവിക്കൊടി വീശി ഒരു സംഘം; നടപടിയുമായി യുപി പൊലീസ്

രാമനവമി ആഘോഷങ്ങള്‍ നടക്കുന്നതിനിടയില്‍ ഒരു കൂട്ടമാളുകള്‍ യുപിയിലെ പ്രയാഗ്രാജില്‍ കാവിക്കൊടിയുമായി ദര്‍ഗയ്ക്ക് മുകളില്‍ കയറി മുദ്രാവാക്യം വിളിച്ചു. സികന്ദ്ര പ്രദേശത്തെ സലാര്‍ മസൂദ് ഖാസി മിയാന്‍ ദര്‍ഗയിലാണ് സംഭവം. ഇതിന്റെ ദൃശ്യങ്ങള്‍ ഇപ്പോള്‍ വ്യാപകമായി പ്രചരിക്കുന്നുണ്ട്. ഇന്ത്യ ടുഡേ ഉൾപ്പെടെയുള്ള ദേശീയ മാധ്യമങ്ങളാണ് വാർത്ത റിപ്പോർട്ട് ചെയ്യുന്നത്.

മഹാരാജ സുഹെൽദേവ് സമ്മാൻ സുരക്ഷാ മഞ്ച് എന്ന ഹിന്ദു സംഘടനയുമായി ബന്ധപ്പെട്ട ഒരു കൂട്ടം ആളുകൾ സിക്കന്ദ്ര പ്രദേശത്തുള്ള സലാർ മസൂദ് ഗാസിയുടെ (ഗാസി മിയാൻ കി ദർഗ എന്നും അറിയപ്പെടുന്നു) ദർഗയിൽ മോട്ടോർ സൈക്കിളുകളിൽ എത്തുന്നത് ഒരു വിഡിയോയിൽ കാണാം. ദര്‍ഗയുടെ മിനാരങ്ങള്‍ക്ക് സമീപത്ത് ഇവര്‍ കൊടികള്‍ പറത്തുകയും ചെയ്തു.

വൈറലാവുന്ന വീഡിയോയില്‍ ദര്‍ഗയ്ക്ക് മുകളില്‍ മൂന്നു പേര്‍ നില്‍ക്കുന്നതാണ് കാണുന്നത്. പൊലീസ് ഉടൻ സ്ഥലത്തെത്തി ആളുകളെ ദർഗയിൽ നിന്ന് നീക്കം ചെയ്തു. ഞായറാഴ്ച നടന്ന സംഭവത്തിൽ ഉൾപ്പെട്ടവർക്കെതിരെ നിയമനടപടി സ്വീകരിക്കുകയാണെന്ന് ഡെപ്യൂട്ടി പൊലീസ് കമ്മീഷണർ ഡിസിപി (ഗംഗാ നഗർ) കുൽദീപ് സിംഗ് ഗുണവത് പറഞ്ഞു.

“ഘാസി മിയാൻ കി ദർഗയിൽ അഞ്ച് ആരാധനാലയങ്ങളുണ്ട്. ഹിന്ദുക്കളും മുസ്ലീം ഭക്തരും ദർഗയിൽ ‘ചാദർ’ അർപ്പിക്കാൻ എത്തുന്നു. ചിലർ മതപരമായ പതാകകൾ വീശുകയും മുദ്രാവാക്യങ്ങൾ വിളിക്കുകയും ചെയ്തു. സ്ഥലത്തുണ്ടായിരുന്ന പൊലീസ് ഉടൻ തന്നെ അവ നീക്കം ചെയ്തു. സ്ഥലത്ത് സമാധാനവും ക്രമസമാധാനവും നിലനിർത്തിയിട്ടുണ്ട്,” അദ്ദേഹം പറഞ്ഞു.

Story Highlights : Men wave saffron flags atop Prayagraj dargah gate on Ram Navami