വിപണിയിൽ കുതിക്കാൻ ഹ്യുണ്ടായി; 2030-ഓടെ ഇന്ത്യയിൽ അവതരിപ്പിക്കുക 26 പുതിയ മോഡലുകൾ

ഇന്ത്യയിലെ ഏറ്റവും വലിയ രണ്ടാമത്തെ വാഹന നിർമാതാക്കൾ ദക്ഷിണ കൊറിയൻ വാഹന നിർമാതാക്കളായ ഹ്യുണ്ടായി. ഇനി ഒന്നാമനാകാനുള്ള നടപടികളിലേക്ക് കടക്കുകയാണ് ഹ്യുണ്ടായി. 2030-ഓടെ ഇന്ത്യയിൽ 26 പുതിയ മോഡലുകൾ അവതരിപ്പിക്കുമെന്നാണ് ഹ്യുണ്ടായി അറിയിച്ചിരിക്കുന്നത്.

2025 സാമ്പത്തിക വർഷത്തിനും 2030 സാമ്പത്തിക വർഷത്തിനും ഇടയിൽ ഇന്ത്യയിൽ 20 ഐസിഇ വാഹനങ്ങളും 6 ഇലക്ട്രിക് വാഹനങ്ങളും പുറത്തിറക്കുമെന്ന് കമ്പനി സ്ഥിരീകരിച്ചിട്ടുണ്ട്. കൂടാതെ, ബ്രാൻഡിന്റെ ഇന്ത്യൻ ഷോറൂമുകളിൽ ഹൈബ്രിഡ് മോഡലുകൾ എത്തും. ഈ വർഷം സെപ്റ്റംബറിൽ തന്നെ ആദ്യ ഹൈബ്രിഡ് വാഹനം ഇന്ത്യൻ വിപണിയിൽ പ്രവേശിച്ചേക്കാം.

പുതിയ മോഡലുകളുടെ വരവിനെ പിന്തുണയ്ക്കുന്നതിനായി വാഹന നിർമ്മാതാക്കൾ ഉൽപ്പാദന വിപുലീകരണ പദ്ധതികൾ പ്രഖ്യാപിച്ചു. 2026 മൂന്നാം പാദത്തോടെ പൂനെയിലെ തലേഗാവ് പ്ലാന്റിൽ ഉൽപ്പാദനം ആരംഭിക്കും. ഹൈബ്രിഡ് വാഹനങ്ങൾക്കും ഉൽപ്പാദന യൂണിറ്റ് സൗകര്യമൊരുക്കുമെന്ന് പ്രതീക്ഷിക്കുന്നു. ഒമ്പത് എസ്‌യുവികളും മൂന്ന് ഹാച്ച്ബാക്കുകളും രണ്ട് സെഡാൻ മോഡലുകളും ഉൾപ്പെടെ 14 വാഹനങ്ങളാണ് നിലവിൽ ഹ്യുണ്ടായി ഇന്ത്യയുടെ വാഹന നിരയിലുള്ളത്.

കൂടാതെ, ആഭ്യന്തര വിപണിയിലെ വിൽപ്പനയിലെ കുറവ് കാരണം, 2025 മാർച്ച് 31 ന് അവസാനിച്ച നാലാം പാദത്തിൽ കമ്പനിയുടെ നികുതിക്ക് ശേഷമുള്ള ലാഭം 4 ശതമാനം ഇടിഞ്ഞ് 1,614 കോടി രൂപയായി. കഴിഞ്ഞ സാമ്പത്തിക വർഷം കമ്പനിയുടെ ആഭ്യന്തര വിൽപ്പന 5,98,666 യൂണിറ്റായി കുറഞ്ഞു. 2023-24 സാമ്പത്തിക വർഷത്തിൽ ഇത് 6,14,721 യൂണിറ്റായിരുന്നു. 2025 സാമ്പത്തിക വർഷത്തിൽ കയറ്റുമതി 1,63,386 യൂണിറ്റായി മാറ്റമില്ലാതെ തുടർന്നു. 2023-24 സാമ്പത്തിക വർഷത്തിൽ ഇത് 1,63,155 യൂണിറ്റായിരുന്നു.

Story Highlights : Hyundai India To Launch 26 New Cars By 2030