ഗുർമീതിനെ രക്ഷപ്പെടുത്താൻ ശ്രമം; അനുയായികൾ പിടിയിൽ

ബലാത്സംഗക്കേസിൽ ശിക്ഷ അനുഭവിക്കുന്ന ദേരാ സച്ചാ സൗദ തലവൻ ഗുർമീത് റാം റഹീമിനെ രക്ഷപ്പെടുത്താൻ ശ്രമിച്ച അനുയായികൾ പിടിയിൽ. ഗുർമീതിനെ കോടതിയിൽനിന്ന് ജയിലിലേക്ക് മാറ്റുന്നതിനിടെ രക്ഷപ്പെടുത്താൻ ഗൂഢാലോചന നടത്തിയ കേസിൽ മൂന്ന് ദേരാ സച്ചാ പ്രവർത്തകരാണ് പിടിയിലായത്. വെള്ളിയാഴ്ച രാത്രിയിലാണ് ഇവരെ പോലീസ് സംഘം അറസ്റ്റ് ചെയ്തത്. ഇവരെ ഇന്ന് കോടതിയിൽ ഹാജരാക്കും.

അതേസമയം, പഞ്ചാബ് ഹരിയാന ഹൈക്കോടതിയുടെ ഉത്തരവിനെ തുടർന്ന് ഗുർമീതിന്റെ സങ്കേതത്തിന്റെ ആസ്ഥാനത്ത് റെയ്ഡ് തുടരുകയാണ്. കനത്ത സുരക്ഷയിലാണ് ആശ്രമത്തിൽ പോലീസ് പരിശോധന തുടരുന്നത്. സുരക്ഷയ്ക്കായി അർധസൈനികരെയും വിന്യസിച്ചിട്ടുണ്ട്. റെയ്ഡിൽ ഇതുവരെ അസാധു നോട്ടുകളും രജിസ്‌ട്രേഷനില്ലാത്ത കാറുകളും കണ്ടെത്തി.