അഗ്‌നിപർവ്വതം പുകയുന്നു; ഇന്തോനേഷ്യയിൽ ജനങ്ങളെ ഒഴിപ്പിച്ചു

ഇന്തോനേഷ്യയിലെ ബാലിയിലുള്ള മൗണ്ട് അഗംഗ് അഗ്‌നിപർവതം പൊട്ടിത്തെറിച്ചേക്കുമെന്ന് മുന്നറിയിപ്പ്. സമീപ പ്രദേശങ്ങളിൽനിന്നും ജനങ്ങളെ ഒഴിപ്പിച്ചു.ചൊവ്വാഴ്ച വൈകുന്നേരം മുതൽ അഗ്‌നിപർവതത്തിൽനിന്ന് പുക വരുന്നുണ്ടെന്ന് ദേശീയ ദുരന്ത നിവാരണ ഏജൻസി അറിയിച്ചു.

അതേസമയം, പുക പർവ്വതത്തിൽ നിന്നും 700 മീറ്റർ ഉയരത്തിലെത്തിയതായി മിനിസ്ട്രി ഓഫ് വോൾക്കോളജി ആൻഡ് ജിയോളജിക്കൽ ഹസാർഡ് മിറ്റിഗേഷൻ സെന്റർ അറിയിച്ചു. ഇപ്പോഴും പുക ഉയരുന്നുണ്ട്. എന്നാൽ ആരും പരിഭ്രാന്തരാകേണ്ടതില്ലെന്നും അധികൃതർ വ്യക്തമാക്കി.

ലോകത്തിൽ ഏറ്റവും കൂടുതൽ സജീവ അഗ്‌നിപർവതങ്ങളുള്ള രാജ്യമാണ് ഇന്തോനേഷ്യ. 1963നും 64നും ഇടയ്ക്ക് മൗണ്ട് അഗംഗ് പലതവണ പൊട്ടിത്തെറിച്ച് ആയിരത്തിലധികം പേർ മരിച്ചിരുന്നു.