തിരഞ്ഞെടുപ്പ് വിജയം തെറ്റിദ്ധാരണകള്‍ പരത്തിയവര്‍ക്കുള്ള മറുപടി; മോദി

ബിജെപിക്കെതിരെ ഒളിഞ്ഞും തെളിഞ്ഞും തെറ്റിദ്ധാരണകള്‍ പരത്തുന്നവര്‍ക്കുള്ള ശക്തമായ മറുപടിയാണ് ഇന്നത്തെ തിരഞ്ഞെടുപ്പ് ഫലങ്ങളെന്ന് പ്രധാനമന്ത്രി നരേന്ദ്ര മോദി. പലരും ബിജെപിക്കെതിരെ നുണക്കഥകള്‍ പ്രചരിപ്പിക്കാന്‍ ശ്രമിച്ചു. പക്ഷേ, അന്തിമ വിധി വന്നപ്പോള്‍ ജനങ്ങള്‍ക്ക് ബിജെപിയിലുള്ള വിശ്വാസം പ്രകടമായി. ബിജെപിക്കെതിരെ തെറ്റിദ്ധാരണകള്‍ പരത്തിയവര്‍ക്കുള്ള മറുപടിയാണ് ത്രിപുരല്‍ കണ്ടത്. ഒന്നുമല്ലാതിരുന്നിടത്തു നിന്ന് ഭരണം കൈയ്യാളിയിരിക്കുകയാണ് ബിജെപി. അസ്തമയത്തിലാണ് ചുവപ്പ് വരുന്നത്. ഉദയത്തില്‍ പ്രകൃതി കാവിയണിയും. ഇന്ന് ത്രിപുരയുടെ ഉദയമാണ്. ബിജെപി സര്‍ക്കാര്‍ ത്രിപുരയെ നയിക്കും. അവര്‍ക്ക് വേണ്ടതെല്ലാം നല്‍കും. ത്രിപുര തിരഞ്ഞെടുത്തിരിക്കുന്നത് യുവജനപ്രതിനിധികളെയാണ്. അവരുടെ കീഴില്‍ സംസ്ഥാനത്ത് നിരവധി മാറ്റങ്ങള്‍ കൊണ്ടുവരാന്‍ സാധിക്കും. ഇന്ത്യയെ വികസനത്തിലേക്ക് നയിക്കുന്നത് ഉത്തരേന്ത്യയിലെ മുന്നേറ്റങ്ങളാണെന്നും പ്രധാനമന്ത്രി പറഞ്ഞു. ഡല്‍ഹിയിലുള്ള ബിജെപിയുടെ ആസ്ഥാനമന്ദിരത്തില്‍ പാര്‍ട്ടി അണികളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.