ശീതള പാനീയ കച്ചവടത്തിൻറെ മറവിൽ കഞ്ചാവ് വിൽപ്പന; ബംഗാൾ സ്വദേശി അറസ്റ്റിൽ

ശീതള പാനീയ കച്ചവടത്തിൻറെ മറവിൽ കഞ്ചാവും പുകയില ഉൽപ്പന്നങ്ങളും വിൽപ്പന നടത്തിവന്ന ഇതര സംസ്ഥാനക്കാരൻ തിരുവല്ലയിൽ അറസ്റ്റിലായി. ബംഗാൾ മൂർഷിദാബാദ് സ്വദേശി മുഹമ്മദ് ആലമാണ് പിടിയിലായത്.

തിരുവല്ലയിൽ നഗരമധ്യത്തിലായിരുന്നു മുഹമ്മദ് ആലമിൻറെ ശീതള പാനീയ വിൽപ്പനശാല. ഇവിടെ കഞ്ചാവും ലഭ്യമാണെന്ന വിവരം പൊലീസിന് കിട്ടി. കഴിഞ്ഞ ഏതാനും ദിവസങ്ങളായി കട പൊലീസിൻറെ നിരീക്ഷണത്തിലായിരുന്നു.

മുഹമ്മദ് ആലമിന്റെ കടയിൽ നിന്നും ഒന്നര കിലോ കഞ്ചാവും 7000 പാക്കറ്റ് നിരോധിത പുകയില ഉൽപ്പന്നങ്ങളും പിടിച്ചെടുത്തു. ഇയാളുടെ വീട്ടിൽനിന്ന് അരക്കിലോ കഞ്ചാവ് കൂടി കണ്ടെടുത്തു.