കത്‌വ പീഡനക്കേസിലെ ഇരയുടെ പേര് വെളിപ്പെടുത്തിയ കേസിൽ ഡൽഹി ഹൈക്കോടതി ഇന്ന് വാദം കേൾക്കും

കത്‌വ പീഡന കൊലപാതകത്തിൽ മാധ്യമങ്ങൾ ഇരയുടെ പേര് വെളിപ്പെടുത്തിയ കേസിൽ ഡൽഹി ഹൈക്കോടതി ഇന്ന് വാദം കേൾക്കും. ഏപ്രിൽ 18 ന് കേസ് പരിഗണിച്ച കോടതി പെൺകുട്ടിയുടെ പേര് വെളിപ്പെടുത്തിയ സ്ഥാപനങ്ങൾ 10 ലക്ഷം രൂപ പിഴയടക്കണം എന്ന് ആവശ്യപ്പെട്ടിരുന്നു. അതിനിടെ കേസിൽ വ്യാജ വാർത്ത പ്രചരിപ്പിച്ച പ്രതികളുടെ അഭിഭാഷകന് എതിരെ നടപടി എടുക്കണമെന്ന് ആവശ്യപ്പെട്ട് ക്രൈംബ്രാഞ്ച് കത്‌വ കോടതിയെ സമീപിക്കും.

കത്‌വയിൽ ലൈംഗികപീഡനത്തിന് ഇരയായി കൊല്ലപ്പെട്ട പെൺകുട്ടിയെ തിരിച്ചറിയുന്ന രീതിയിൽ പേരും ചിത്രവും പ്രസിദ്ധീകരിച്ച മാധ്യമങ്ങൾക്ക് ഡൽഹി ഹൈകോടതി നേരത്തെ 10 ലക്ഷം രൂപ വീതം പിഴയിട്ടിരുന്നു. തുക ജമ്മുകശ്മീരിലെ ഇരകളുടെ പുനരധിവാസ ഫണ്ടിലേക്ക് നൽകുമെന്നും കോടതി അറിയിച്ചിരുന്നു. കേസിന്റെ തുടർനടപടികളാണ് ഇന്ന് നടക്കുക.