പാലക്കാട് നഗരസഭയിലെ ബിജെപിക്കെതിരായ അവിശ്വാസ പ്രമേയത്തിന് തിരിച്ചടി

ബിജെപി ഭരിക്കുന്ന സംസ്ഥാനത്തെ ഏക നഗരസഭയായ പാലക്കാട് യുഡിഎഫിന്റെ അവിശ്വാസ പ്രമേയം. അവിശ്വാസ പ്രമേയത്തെ പിന്തുണക്കാന്‍ സിപിഎം രംഗത്തെത്തിയെങ്കിലും ഒരു സിപിഎം അംഗത്തിന്റെ വോട്ട് അസാധുവായതിനെ തുടര്‍ന്ന് അവിശ്വാസ പ്രമേയത്തിന് തിരിച്ചടി. ആരോഗ്യ സ്റ്റാന്‍ഡിംഗ് കമ്മീഷന്‍ അധ്യക്ഷനെതിരായിരുന്നു പ്രമേയം.

രണ്ട് ബിജെപി സ്റ്റാൻഡിംഗ് കമ്മിറ്റി അംഗങ്ങൾക്കെതിരായ പ്രമേയവും ഇന്ന് പരിഗണിക്കും.

യുഡിഎഫ് കൊണ്ടുവന്ന അവിശ്വാസ പ്രമേയത്തിന് പിന്തുണ നൽകുമെന്ന് സിപിഎം രാവിലെ അറിയിച്ചിരുന്നു. ജില്ലാ സെക്രട്ടറി സി.കെ. രാജേന്ദ്രന്‍റെ നേതൃത്വത്തിൽ ചേർന്ന യോഗത്തിലാണ് ഇത് സംബന്ധിച്ച് തീരുമാനമുണ്ടായത്.

നഗരസഭയിലെ ബിജെപി ഭരണം സർവത്ര അഴിമതിയിൽ മുങ്ങിയതാണെന്ന് യുഡിഎഫ് ആരോപിക്കുന്നു. നാല് ബിജെപി സ്റ്റാൻഡിംഗ് കമ്മിറ്റി അംഗങ്ങൾക്കെതിരേയാണ് യുഡിഎഫ് അവിശ്വാസ പ്രമേയ നോട്ടീസ് നൽകിയത്. നഗരസഭയിലെ 52 അംഗങ്ങളിൽ ബിജെപിക്ക് 24, യുഡിഎഫിന് 18, എൽഡിഎഫ് ഒന്പത്, വെൽഫെയർ പാർട്ടി ഒന്ന് എന്നിങ്ങനെയാണ് അംഗബലം.