ചെങ്ങന്നൂരിൽ വോട്ടെടുപ്പ് തുടങ്ങി

ചെങ്ങന്നൂരിൽ വോട്ടെടുപ്പ് തുടങ്ങി. രണ്ട് ലക്ഷത്തോളം വോട്ടർമാരാണ് ഇന്ന് വിധിയെഴുതുന്നത്. രാവിലെ ഏഴ് മണി മുതൽ പോളിങ് ആരംഭിച്ചു. ഇതിന് മുന്നോടിയായി ആറ് മണിക്ക് പോളിങ് ഏജന്റുമാരുടെ സാന്നിദ്ധ്യത്തിൽ മോക് പോളിങ് നടത്തി. സ്ഥാനാർത്ഥികളുടെ എണ്ണം കണക്കിലെടുത്ത് ഒരു ബൂത്തിൽ രണ്ട് വോട്ടിങ് മെഷീനുകളാണ് സജ്ജീകരിച്ചിരിക്കുന്നത്. 1,99,340 വോട്ടർമാരുള്ള മണ്ഡലത്തിലാകെ 164 ബൂത്തുകളാണുള്ളത്.

അതിനിടെ, പേരിശ്ശേരി ഗവ. യുപി സ്‌കൂളിലെ 88ാം നമ്പർ ബൂത്തിൽ മോക് പോളിനിടെ വോട്ടിങ് മെഷീൻ തകരാറിലായി. തുടർന്ന് തകരാർ പരിഹരിച്ച് മിനിറ്റുകൾക്കുള്ളിൽ തന്നെ വോട്ടെടുപ്പ് തുടങ്ങാൻ കഴിഞ്ഞു. വെൺമണി പഞ്ചായത്തിലെ 150ാം നമ്പർ ബൂത്തിൽ വിവി പാറ്റ് മെഷീൻ തകരാറിലായതിനെ തുടർന്ന് ഇത് മാറ്റിവെച്ചു.