കര്‍ണാടകയില്‍ വീണ്ടും ഭക്ഷ്യവിഷബാധ; പ്രസാദം കഴിച്ച സ്ത്രീ മരിച്ചു

കര്‍ണാടകയില്‍ ക്ഷേത്രത്തില്‍ വിതരണം ചെയ്ത പ്രസാദത്തില്‍ വീണ്ടും ഭക്ഷ്യവിഷബാധ. ഒരു സ്ത്രീ മരിച്ചു. 9 പേര്‍ ഗുരുതരാവസ്ഥയില്‍ ചികിത്സയിലാണ്. ചിക്കബെല്ലാപുരയിലെ ഗംഗമ്മ ദേവീക്ഷേത്രത്തില്‍ ഉത്സവത്തിനിടെ ഒരു സംഘം സ്ത്രീകള്‍ വിതരണം ചെയ്ത പ്രസാദം കഴിച്ചവര്‍ക്കാണ് വിഷബാധയേറ്റത്.

പ്രദേശവാസിയായ കവിത എന്ന സ്ത്രീയാണ് മരിച്ചത്. ഇവരുടെ കുടുംബത്തിലെ അംഗങ്ങളെല്ലാവരും ആസ്പത്രിയില്‍ ചികിത്സയിലാണ്. പ്രസാദം വിതരണം ചെയ്തത് ക്ഷേത്രം അധികൃതരുടെ അറിവോടെയല്ലെന്ന് പോലീസ് അറിയിച്ചു. സംഭവത്തെപ്പറ്റി അന്വേഷണം നടക്കുകയാണ്. കഴിഞ്ഞമാസം കര്‍ണാടകയില്‍ ചാമരാജ്‌നഗര്‍ ജില്ലയില്‍ ക്ഷേത്രത്തില്‍ നിന്നും വിഷം കലര്‍ന്ന പ്രസാദം കഴിച്ച് 17 പേര്‍ മരിച്ചിരുന്നു.