കൊലപാതകികള്‍ക്കെതിരെ സമരം ചെയ്തതിന് എത്ര കേസുകളിലും ശിക്ഷ അനുഭവിക്കാന്‍ തയ്യാര്‍; ഡീന്‍ കുര്യാക്കോസ്

കൊലപാതകികള്‍ക്കെതിരെ സമരം നടത്തിയതിന്റെ പേരില്‍ എത്ര കേസുകളില്‍ വേണമെങ്കിലും ശിക്ഷ അനുഭവിക്കാന്‍ തയ്യാറാണെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ്. സമാധാനപരമായ ഹര്‍ത്താലിന് മാത്രമേ ആഹ്വാനം ചെയ്തിട്ടുള്ളൂ. എന്നാല്‍ അങ്ങനെയല്ലെന്ന് തെറ്റിദ്ധരിപ്പിക്കാനുള്ള ശ്രമങ്ങളാണുണ്ടായതെന്നും ഡീന്‍ കുര്യാക്കോസ് വ്യക്തമാക്കി. ആലുവയില്‍ എസ്.പി. ഓഫീസ് മാര്‍ച്ച് ഉദ്ഘാടനം ചെയ്യുകയായിരുന്നു ഡീന്‍. കോടതിയോട് ബഹുമാനമുണ്ടെന്നും എന്നാല്‍ സര്‍ക്കാര്‍ കോടതിയെ തെറ്റിദ്ധരിപ്പിക്കുകയാണെന്നും സമരം ചെയതവര്‍ക്കെതിരെ കേസെടുക്കാന്‍ കാണിക്കുന്നതിന്റെ പകുതി ആര്‍ജ്ജവമെങ്കിലും കൊലപാതകികളെ അറസ്റ്റു ചെയ്യാന്‍ കാണിക്കണമെന്നും ഡീന്‍ കുര്യാക്കോസ്  പറഞ്ഞു.

ഹര്‍ത്താല്‍ പ്രഖ്യാപിച്ചതുമായി ബന്ധപ്പെട്ട കോടതിയലക്ഷ്യ ഹര്‍ജിയില്‍ ഡീന്‍ കുര്യാക്കോസിനെതിരെ രൂക്ഷ വിമര്‍ശനമാണ് ഹൈക്കോടതി കഴിഞ്ഞ ദിവസം നടത്തിയത് ഹര്‍ത്താലിന്റെ നഷ്ടം ഡീന്‍ കുര്യാക്കോസില്‍ നിന്നും ഈടാക്കണമെന്ന് ചീഫ് ജസ്റ്റിസ് അധ്യക്ഷനായ ബെഞ്ച് ഉത്തരവിട്ടു. ഡീന്‍ അടക്കം 3 പേര്‍ക്ക് എതിരെ പ്രേരണ കുറ്റം ചുമത്തി കേസ് എടുക്കാന്‍ കോടതി നിര്‍ദ്ദേശിച്ചത്. ഹര്‍ത്താല്‍ നടത്തിയ നേതാക്കള്‍ക്കെതിരെ കേസെടുക്കാമെന്ന് ഹൈക്കോടതി വാക്കാല്‍ പരാമര്‍ശിച്ചിരുന്നു. എന്നാല്‍ ഇത് ഉത്തരവില്‍ ഉള്‍പ്പെടുത്തിയിരുന്നില്ല. ഈ മാസം 28നകം വിശദാംശങ്ങള്‍ അറിയിക്കാനും എ ജിയോട് ഹൈക്കോടതി നിര്‍ദേശിച്ചിരുന്നു. ഈ മാസം 18 ലെയും ജനുവരി 3 ലെയും ഹര്‍ത്താല്‍ അക്രമങ്ങളില്‍ നേതാക്കളെ പ്രതിചേര്‍ക്കാമെന്നാണ് നിയമോപദേശം.

കാസര്‍ഗോഡ് ജില്ലയിലെ നഷ്ടം യുഡിഎഫ് ഭാരവാഹികളായ കമറുദ്ദിന്‍, ഗോവിന്ദന്‍ നായര്‍ എന്നിവരില്‍ വഹിക്കണമെന്നും കോടതി പറഞ്ഞു. വാദത്തിനിടെ ഡീന്‍ കുര്യാക്കോസ് നിയമം പഠിച്ചതല്ലേയെന്ന് കോടതി ചോദിച്ചു. ഉത്തരവിനെക്കുറിച്ച് അറിയില്ലെന്ന് ഡീനിന്റെ അഭിഭാഷകന്‍ പറഞ്ഞപ്പോഴായിരുന്നു കോടതിയുടെ മറുചോദ്യം. നിയമം പഠിച്ചിട്ടുണ്ടെങ്കിലും പ്രാക്ടീസ് ചെയ്യുന്നില്ലെന്ന് മറുപടിയായി അഭിഭാഷകന്‍ പറഞ്ഞു.ആദ്യ കേസായാണ് കോടതി ഡീന്‍ കുര്യാക്കോസിനും കാസര്‍ഗോഡ് ഡിസിസി നേതാക്കള്‍ക്കെതിരേയും പരിഗണിച്ചത്. ഹര്‍ത്താല്‍ ദിനത്തില്‍ ഉണ്ടായ നഷ്ടം കണക്കാക്കാന്‍ കമ്മീഷണനെ നിയമിക്കുന്ന കാര്യം പരിഗണിക്കുമെന്ന് കോടതി പറഞ്ഞു.

ഇതിനു പിന്നാലെ യൂത്ത്‌കോണ്‍ഗ്രസ് നേതാവ് ഡീന്‍കുര്യാക്കോസ് ഉള്‍പ്പെടെ നേതാക്കള്‍ക്കെതിരെ കേസെടുക്കാമെന്ന് അഡ്വക്കറ്റ് ജനറലിന്റെ നിയമോപദേശം പോലീസിന് ലഭിക്കുകയും ചെയ്തു. ശബരിമല കര്‍മ്മസമിതി നേതാക്കള്‍ക്കെതിരേയും കേസെടുക്കാമെന്നും നിയമോപദേശം ലഭിച്ചിട്ടുണ്ട്. സുപ്രീം കോടതി ഉത്തരവിന്റെ അടിസ്ഥാനത്തിലാണ് നിയമോപദേശം.ഈമാസം 18 ന് ഉണ്ടായ ഹര്‍ത്താല്‍ അതിക്രമങ്ങളിലും കേസെടുക്കാമെന്നാണ് ഡി.ജി.പിക്ക് നിയമോപദേശം ലഭിച്ചത്