അടൂർ ഏനാത്ത് മൂന്ന് വിദ്യാർത്ഥികൾ കല്ലടയാറ്റിൽ മുങ്ങി മരിച്ചു

പത്തനംതിട്ട അടൂർ ഏനാത്ത് മൂന്ന് വിദ്യാർത്ഥികൾ കല്ലടയാറ്റിൽ മുങ്ങി മരിച്ചു. മണ്ണടി ദളവാ ജംഗ്ഷനിൽ കുരുമ്പേലിൽ നാസറിന്റെ മക്കളായ നാസിം (15) അജ്മൽ (19) ഇവരുടെ ബന്ധു പോരുവഴി സ്വദേശി നിയാസ് (15) എന്നിവരാണ് കല്ലടയാറ്റിലെ തെങ്ങും പുഴ കടവിൽ
മുങ്ങി മരിച്ചത്. ഉച്ചയ്ക്ക് 12 മണിയോടെയായിരുന്നു അപകടം. ആറ്റിൽ കുളിക്കാനിറങ്ങിയ ഇവർ ആഴമുള്ള ഭാഗത്ത് മുങ്ങിപ്പോവുകയായിരുന്നു.

ഫയർഫോഴ്‌സും നാട്ടുകാരും ചേർന്ന് രക്ഷാപ്രവർത്തനം നടത്തിയെങ്കിലും ജീവൻ രക്ഷിക്കാനായില്ല. മൂന്നു പേരുടേയും മൃതദേഹങ്ങൾ അടൂർ ഗവ.ആശുപത്രിയിലെ മോർച്ചറിയിലേക്ക് മാറ്റി. പോസ്റ്റ്‌മോർട്ടത്തിനു ശേഷം മൃതദേഹം നാളെ ബന്ധുക്കൾക്ക് കൈമാറും.