സതാംപ്ടണിൽ മഴ കളിയ്ക്കുന്നു; മത്സരം ഉപേക്ഷിക്കാൻ സാധ്യത

ദക്ഷിണാഫ്രിക്കയും വെസ്റ്റ് ഇൻഡീസും തമ്മിലുള്ള ലോകകപ്പ് മത്സരം മഴ ഭീഷണിയിൽ. ദക്ഷിണാഫ്രിക്കൻ ഇന്നിംഗ്സ് 7.3 ഓവറുകൾ മാത്രം കളിച്ചപ്പോഴേക്കും പെയ്ത് തുടങ്ങിയ മഴ ഇതുവരെ തോർന്നിട്ടില്ല. 20 ഓവർ മത്സരത്തിനുള്ള കട്ട് ഓഫ് ടൈം ഇന്ത്യൻ സമയം 9.30 ആണ്. മഴ പൂർണമായും മാറാത്തതു കൊണ്ട് തന്നെ മത്സരം ഉപേക്ഷിക്കാനുള്ള സാധ്യത നിലനിൽക്കുന്നുണ്ട്.

ടോസ് നഷ്ടമായി ബാറ്റിംഗിനയക്കപ്പെട്ട ദക്ഷിണാഫ്രിക്കയ്ക്ക് 29 റൺസെടുക്കുന്നതിനിടെ രണ്ട് വിക്കറ്റുകളാണ് ഇതുവരെ നഷ്ടമായത്. ഹാഷിം അംല (6), എയ്ഡൻ മാർക്രം (5) എന്നിവരുടെ വിക്കറ്റുകളാണ് നഷ്ടമായത്. പേസർ ഷെൽഡൻ കോട്രലാണ് രണ്ടു വിക്കറ്റുകളും നേടിയത്. 17 റൺസുമായി ക്വിൻ്റൺ ഡികോക്കും റണ്ണൊന്നുമെടുക്കാതെ ഫാഫ് ഡുപ്ലെസിസുമാണ് ക്രീസിൽ.