ബസ് മാറി കയറിയ മകളെ സുരക്ഷിതമായി കൈകളിലെത്തിച്ച ബസ് കണ്ടക്ടർക്ക് സല്യൂട്ട് നൽകി പിതാവ്; വൈറൽ കുറിപ്പ്

ബസ് മാറി കയറിയ മകളെ സുരക്ഷിതമായി കൈകളിലെത്തിച്ച ബസ് കണ്ടക്ടർക്ക് നന്ദി പറഞ്ഞ് പിതാവിന്റെ ഫേസ്ബുക്ക് പോസ്റ്റ് വൈറലാകുന്നു. പത്തനംതിട്ട സ്വദേശിയായ സന്തോഷ് കുര്യനാണ് മകളെ സുരക്ഷിതമായി ഏൽപ്പിച്ച കണ്ടക്ടർക്ക് നന്ദി പറഞ്ഞ് കുറിപ്പെഴുതിയത്. നിരവധി പേർ പോസ്റ്റ് ലൈക്ക് ചെയ്യുകയും ഷെയർ ചെയ്യുകയും ചെയ്തു.

ആറന്മുളയിലേക്കുള്ള ബസിന് പകരം കുട്ടി കയറിയത് പത്തനംതിട്ടയ്ക്ക് പോയ പാഴൂർ ബസിലായിരുന്നു. ബസ് മാറി കയറിയത് വ്യക്തമായതോടെ കണ്ടക്ടർ കുട്ടിയുമായി ഇലന്തൂർ എന്ന സ്ഥലത്ത് ഇറങ്ങുകയായിരുന്നു. തുടർന്ന് കുട്ടിയെകൊണ്ട് സന്തോഷ് കുര്യനെ ഫോണിൽ ബന്ധപ്പെടുകയായിരുന്നു. അച്ഛൻ എത്തുന്നതുവരെ കുട്ടിയുമായി വെയിറ്റിംഗ് ഷെഡിൽ കാത്തിരിക്കുകയും ചെയ്തു.

ഫേസ്ബുക്ക് പോസ്റ്റിന്റെ പൂർണ്ണരൂപം

ഇന്നെനിക്ക് മറക്കാത്ത ദിനം…
പാഴൂർ മോട്ടേഴ്‌സിനും അതിലെ ജീവനക്കാർക്കും എന്റെ ഹൃദയത്തിൽ നിന്നും ഒരായിരം നന്ദിയുടെ പൂച്ചെണ്ടുകൾ…

കോഴഞ്ചേരിയിൽ നിന്നും ചെങ്ങന്നൂർ ബസിൽ കയറി ആറന്മുളയിൽ ഇറങ്ങേണ്ട, ഏഴാം ക്ലാസിൽ പഠിക്കുന്ന എന്റെ മകൾ ഇന്ന് ബസ് തെറ്റി പത്തനംതിട്ടക്ക് പോയ പാഴൂർ ബസിൽ കയറുകയും ഇലന്തൂർ എത്തിയപ്പോൾ അതിലെ കണ്ടക്ടർ എവിടെ പോകാനാണെന്ന് തിരക്കിയപ്പോൾ ആറന്മുളക്കാണെന്ന് മോൾ പറഞ്ഞപ്പോൾ അതിലെ കണ്ടക്ടർ സന്തോഷ് എന്നയാൾ മോളെയും കൊണ്ട് അവിടെ ഇറങ്ങുകയും തന്റെ ഫോണിൽ നിന്നും മോളെക്കൊണ്ട് എന്നെ വിളിപ്പിച്ച് വിവരം അറിയിക്കുകയും ചെയ്തു. തുടർന്ന് കോഴഞ്ചേരിയിൽ നിന്നും ഞാൻ ഇലന്തൂർ എത്തുന്നതു വരെ മകളെയും കൊണ്ട് ഇലന്തൂരിലെ വെയ്റ്റിംഗ് ഷെഡിൽ കാത്തിരുന്ന് സുരക്ഷിതമായി മകളെ എന്നെ ഏൽപിച്ചിട്ടാണ് സന്തോഷ് എന്ന ആ നല്ല മനുഷ്യൻ യാത്രയായത്….

സാധാരണ ഇത്തരം സാഹചര്യങ്ങളിൽ സ്റ്റോപ്പിൽ ഇറക്കുകയോ, മറ്റാരെയെങ്കിലും പറഞ്ഞ് ഏൽപിച്ച് തങ്ങളുടെ ട്രിപ്പ് തുടരുകയാണ് പതിവ്… എന്നാൽ അതിൽ നിന്നും വ്യത്യസ്തമായി ബസ് പറഞ്ഞു വിട്ടിട്ട് എന്റെ മകളേയും കൊണ്ട് എന്നെ കാത്തിരുന്ന ആ പ്രിയ സുഹൃത്തിനോട് അപ്പോഴത്തെ പ്രത്യേക മാനസികാവസ്ഥയിൽ നല്ല ഒരു നന്ദി വാക്കുപറയുവാൻ എനിക്ക് കഴിഞ്ഞില്ല… പിന്നീട് ഫോണിൽ വിളിച്ച് നന്ദി പറഞ്ഞപ്പോൾ ആ മനുഷ്യൻ എന്നോട് പറഞ്ഞത് എനിക്കും ഒരു മകളുണ്ട്,,, അത്രയേ ചിന്തിച്ചുള്ളൂ എന്നാണ്… പ്രിയ സുഹൃത്തേ നന്ദി,, പ്രിയ സന്തോഷിനും സഹപ്രവർത്തകർക്കും എന്റെയും എന്റെ കുടുംബത്തിന്റെയും പ്രാർത്ഥനകൾ…. നിങ്ങളുടെ നല്ല മനസ്സിന് ദൈവം പ്രതിഫലം തരട്ടെ എന്നു മാത്രം പ്രാർത്ഥിക്കുന്നു…

പാഴൂർ മോട്ടോർസിലെ സന്തോഷിനും സഹപ്രവർത്തകർക്കും ഞങ്ങളുടെ ബിഗ് സല്യൂട്ട്…
എല്ലാവരും ഇത് ഷെയർ ചെയ്യാൻ മറക്കരുത്.. കാരണം കൂടുതൽ നന്മകൾ ചെയ്യാൻ അവർക്ക് അത് പ്രയോജനമാകട്ടെ,,, നന്ദി…