കവളപ്പാറ ഉരുൾപൊട്ടൽ; നാല് മൃതദേഹങ്ങൾ കൂടി കണ്ടെത്തി

മലപ്പുറം കവളപ്പാറയിൽ ഉരുൾപൊട്ടലിൽപെട്ട നാല് പേരുടെ മൃതദേഹങ്ങൾ കൂടി കണ്ടെത്തി. ഇതോടെ കവളപ്പാറയിൽ നിന്നും കണ്ടെത്തിയ മൃതദേഹങ്ങളുടെ എണ്ണം ഒൻപതായി. അതേസമയം, കവളപ്പാറയിൽ ഇന്ന് രണ്ട് തവണ ഉരുൾപൊട്ടി. രക്ഷാപ്രവർത്തനം നടത്തിയവരെ സുരക്ഷിത സ്ഥലങ്ങളിലേക്ക് മാറ്റിയിരുന്നു. മാധ്യമപ്രവർത്തകർ ഉൾപ്പെടെ പ്രദേശത്തു നിന്നും കഷ്ടിച്ചാണ് രക്ഷപ്പെട്ടത്.

വ്യാഴാഴ്ച രാത്രിയോടെയാണ് കവളപ്പാറയിൽ ആദ്യമായി ഉരുൾപൊട്ടിയത്. മുപ്പതോളം കുടുംബാംഗങ്ങളാണ് അന്ന് മണ്ണിനടിയിൽപെട്ടത്. അഞ്ചോളം മൃതദേഹങ്ങൾ ഇവിടെ നിന്നും നേരത്തേ കണ്ടെത്തിയിരുന്നു.