കോഴിക്കോട് ബൈക്കിന് മുകളിൽ മരം കടപുഴകി വീണ് ഒരാൾ മരിച്ചു

കോഴിക്കോട് കല്ലായിയിൽ ബൈക്കിന് മുകളിലേക്ക് മരം കടപുഴകി വീണ് ഒരാൾ മരിച്ചു. കല്ലായി ഫ്രാൻസിസ് റോഡ് നിത നിവാസിൽ അബ്ദുൾ റഹ്മാന്റെ മകൻ മുഹമ്മദ് സാലു (52) ആണ് മരിച്ചത്. കല്ലായി പാലത്തിലാണ് അപകടം ഉണ്ടായത്.

മുഹമ്മദ് സാലുവിന് ഒപ്പമുണ്ടായിരുന്ന മകൾക്ക് കാലിന് ഗുരുതരമായ പരിക്കേറ്റിട്ടുണ്ട്. ഉച്ചയ്ക്ക് ഒരുമണിയോടെയായിരുന്നു സംഭവം. ഇരുവരും ബൈക്കിൽ വരുമ്പോൾ മരം ഇവരുടെ മുകളിലേക്ക് മറിഞ്ഞുവീഴുകയായിരുന്നു. ഇവർ സഞ്ചരിച്ചിരുന്ന ബൈക്കിന് തൊട്ടു പിന്നാലെ വന്ന ഓട്ടോ അപകടത്തിൽ നിന്ന് രക്ഷപ്പെട്ടു. മറിഞ്ഞുവീണ മരം റോഡിൽ നിന്ന് മുറിച്ചുമാറ്റി ഗതാഗതം പുനഃസ്ഥാപിച്ചു. നാട്ടുകാരാണ് രക്ഷാപ്രവർത്തനത്തിന് തുടക്കമിട്ടത്.