മലപ്പുറത്ത് കവർച്ചക്ക് ശേഷം തുണിക്കടക്ക് തീയിട്ടു

മലപ്പുറത്ത് രണ്ടത്താണി കാടാമ്പുഴയിൽ ദേശീയപാതക്കടുത്ത് തുണിക്കടക്ക് തീ പിടിച്ചു. ലക്ഷങ്ങളുടെ നഷ്ടമാണ് കണക്കാക്കുന്നത്.

വെള്ളിയാഴ്ച പുലർച്ചെ മൂന്ന് മണിക്കാണ് സംഭവം. ഇരുനിലകളിലായി പ്രവർത്തിക്കുന്ന മലേഷ്യ ടെക്സ്റ്റയിൽസിന്റെ താഴെ ഭാഗം പൂർണ്ണമായും കത്തി നശിച്ചു. സിസി ടിവി ക്യാമറകളും കത്തി നശിച്ച നിലയിലാണ്.

ഷോപ്പിന്റെ ചുമർ കുത്തിപ്പൊളിച്ചിട്ടുണ്ട്. കവർച്ചക്ക് ശേഷം തീയിട്ടതാണെന്നാണ് സൂചന. രണ്ടത്താണി സ്വദേശിയായ മൂർക്കത്ത് സലീമിന്റേതാണ് സ്ഥാപനം. തിരൂരിൽ നിന്ന് രണ്ട് അഗ്‌നിശമന സേന യൂണിറ്റ് എത്തിയാണ് തീ നിയന്ത്രണ വിധേയമാക്കിയത്. കാടാന്വുഴ പൊലീസ് സംഭവത്തിൽ അന്വേഷണമാരംഭിച്ചു.