കർണാടക മുൻ മന്ത്രി കെ ജെ ജോർജിനെതിരെ എൻഫോഴ്‌സ്‌മെന്റ് ഡയറക്ടറേറ്റിൽ പരാതി

മുൻ മന്ത്രിയും കർണാടകയിലെ മുതിർന്ന കോൺഗ്രസ് നേതാവുമായ കെ ജെ ജോർജിനെതിരെ എൻഫോഴ്‌സ്‌മെന്റ് ഡയറക്ടറേറ്റിൽ പരാതി. കെ ജെ ജോർജ് മന്ത്രിയായിരുന്ന സമയത്ത് വിദേശത്ത് വൻ തോതിൽ അനധികൃത സ്വത്ത് സമ്പാദിച്ചെന്നാണ് പരാതി.

കർണാടക രാഷ്ട്ര സമിതി ചെയർമാൻ രവി കൃഷ്ണ റെഡ്ഡിയാണ് പരാതിയുമായി രംഗത്തെത്തിയിരിക്കുന്നത്. അനധികൃത സ്വത്ത് സമ്പാദനം സംബന്ധിച്ച് കെ ജെ ജോർജിനെതിരെ വിശദമായ അന്വേഷണം വേണമെന്നാണ് രവി കൃഷ്ണ റെഡ്ഡിയുടെ ആവശ്യം. പരാതിയുടെ അടിസ്ഥാനത്തിൽ ഇഡി കേസ് രജിസ്റ്റർ ചെയ്തു. ഫോറിൻ എക്‌സ്‌ചേഞ്ച് മാനേജ്‌മെന്റ് ആക്ട് പ്രകാരമാണ് കേസെടുത്തിരിക്കുന്നത്. കർണാടകയിൽ കോൺഗ്രസ് നേതാക്കളെ ബിജെപി വേട്ടയാടുകയാണെന്ന ആരോപണം നിലനിൽക്കെയാണ് കെ ജെ ജോർജിനെതിരെ പരാതി ഉയർന്നിരിക്കുന്നത്.