തിരുവനന്തപുരത്ത് കെഎസ്ആർടിസി ബസും ബൈക്കും കൂട്ടിയിടിച്ചു; മൂന്ന് യുവാക്കൾ മരിച്ചു

തിരുവനന്തപുരത്ത് കെഎസ്ആർടിസി ബസും ബൈക്കും കൂട്ടിയിടിച്ച് മൂന്ന് യുവാക്കൾ മരിച്ചു. ഒരു ബൈക്കിൽ യാത്ര ചെയ്ത മൂന്ന് പേരാണ് മരിച്ചത്.

ഞായറാഴ്ച രാത്രിയാണ് സംഭവം. പത്തനംതിട്ട മല്ലപ്പള്ളിയിലേക്ക് പോയ കെഎസ്ആർടിസി ബസും വട്ടപ്പാറയിലേക്ക് പോയ ബൈക്കും കൂട്ടിയിടിക്കുകയായിരുന്നു. വെമ്പായത്തിന് സമീപം പെരുങ്കുഴിയിലാണ് അപകടം. 3 പേർ ബൈക്കിൽ ഉണ്ടായിരുന്നു. രണ്ട് പേർ സംഭവ സ്ഥലത്ത് വച്ച് തന്നെ മരിച്ചു. ഒരാളെ ഗുരുതര പരുക്കുകളോടെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. നെടുമങ്ങാട് വെള്ളരികോണം സ്വദേശി മനു, വട്ടപ്പാറ സ്വദേശികളായ ഉണ്ണി, വിഷ്ണു എന്നിവരാണ് മരിച്ചത്. രണ്ട് വാഹനങ്ങളുടേയും അമിത വേഗതയാകാം അപകടകാരണമെന്നാണ് വിലയിരുത്തൽ.