ശബരിമല സ്ത്രീപ്രവേശ വിധി; ഒമ്പതംഗ വിശാല ഭരണഘടനാ ബെഞ്ച് രൂപീകരിച്ചു

ശബരിമല സ്ത്രീപ്രവേശ വിധിക്കെതിരായ പുനഃപരിശോധനാ ഹർജികളിലെ നിയമ സാധുത പരിശോധിച്ച് വാദം കേൾക്കൽ നടപടികൾക്കായി ഒമ്പതംഗ വിശാല ഭരണഘടനാ ബെഞ്ച് രൂപീകരിച്ചു . ചീഫ് ജസ്റ്റിസ് എസ്എ ബോബ്ഡെയാണ് ഒൻപതംഗ ബെഞ്ചിന്റെ അധ്യക്ഷൻ. ആർ ഭാനുമതി, അശോക് ഭൂഷൺ, നാഗേശ്വർ റാവു, എം.ശാന്തനഗൗഡർ, ബി.ആർ.ഗവായ്, എസ്.അബ്ദുൾ നസീർ, ആർ.സുഭാഷ് റെഡ്ഡി, സൂര്യകാന്ത് എന്നിവരാണ് ബെഞ്ചിലെ മറ്റ് അംഗങ്ങൾ. ഇതനുസരിച്ച് ഈ മാസം 13 മുതൽ വാദം കേട്ട് തുടങ്ങും.

അതേസമയം, അഞ്ചംഗ ബെഞ്ചിലെ അംഗങ്ങളെ ഒൻപത് അംഗ ബെഞ്ചിൽ ഉൾപ്പെടുത്തിയിട്ടില്ല എന്നതും ശ്രദ്ധേയമാണ്. എന്നാൽ, ശബരിമല ഉൾപ്പെടെ സ്ത്രീകളുടെ അവകാശവുമായി ബന്ധപ്പെട്ട വിഷയങ്ങളിൽ ഒൻപതംഗ ബെഞ്ചിന്റെ തീരുമാനത്തിന്റെ അടിസ്ഥാനത്തിലാകും പുനഃപരിശോധനാ ഹർജികളിൽ തീർപ്പാക്കുക.