‘നാട് കൂടെയുണ്ട്’; പൗരത്വ നിയമ ഭേദഗതിക്കെതിരെ മന്ത്രി കെ ടി ജലീലിന്റെ ലോങ് മാർച്ച്

പൗരത്വ നിയമ ഭേദഗതിക്കെതിരെ പ്രതിഷേധവുമായി മന്ത്രി കെ ടി ജലീലിന്റെ ലോങ് മാർച്ച്. നാട് കൂടെയുണ്ടെന്ന മുദ്രാവാക്യവുമായി മണ്ഡലത്തിലെ വിവിധ ഭാഗങ്ങളിലൂടെ കാൽ നടയായാണ് ലോങ് മാർച്ച് സംഘടിപ്പിച്ചത്.

പൗരത്വ നിയമ ഭേദഗതിക്കെതിരെ കാൽ നടയാത്ര നടത്തിയാണ് മന്ത്രി കെ ടി ജലീലിന്റെ പ്രതിഷേധം. പത്തു കിലോമീറ്റർ കാൽ നടയായുള്ള ലോങ് മാർച്ച് തവനൂർ വട്ടംകുളത്ത് നിന്നാണ് ആരംഭിച്ചത്. രണ്ട് ദിവസങ്ങളിലായി തവനൂർ മണ്ഡലത്തിൽ വിവിധ സ്ഥലങ്ങളിൽ റാലി കടന്നുപോകും. ഏറ്റവും വേഗതയിൽ രേഖാചിത്രങ്ങൾ വരച്ച് ലോക റെക്കോർഡിട്ട അഡ്വ. ജിതേഷ്ജി തത്സമയ ചിത്ര രചനയിലൂടെ പരിപാടി ഉദ്ഘാടനം ചെയ്തു.

ശബരിമല മാളികപ്പുറം മുൻ മേൽശാന്തി മനോജ് എമ്പ്രാന്തിരി, ഗായകൻ എടപ്പാൾ വിശ്വൻ, ചിത്രകാരൻ ഉദയൻ എടപ്പാൾ തുടങ്ങി നിരവധി പേർ ലോങ് മാർച്ചിൽ അണിചേർന്നു. കഴിഞ്ഞ ദിവസം ആരംഭിച്ച റാലി ഇന്ന് വീണ്ടും മണ്ഡലത്തിലെ വിവിധ ഭാഗങ്ങളിലൂടെ തുടരും. വിവിധ ജനപ്രതിനിധികൾക്കൊപ്പം ബഹുജനങ്ങളും മാർച്ചിൽ പങ്കെടുക്കുന്നുണ്ട്.