ചൈനീസ് സര്‍ക്കാര്‍ നല്‍കിയ സഹകരണത്തിന് നന്ദി അറിയിച്ച് ഇന്ത്യ

കൊറോണ വൈറസ് ബാധയെ തുടര്‍ന്ന് വുഹാനില്‍ നിന്നും ഇന്ത്യക്കാരെ നാട്ടിലെത്തിക്കാന്‍ ചൈനീസ് സര്‍ക്കാര്‍ നല്‍കിയ സഹായ സഹകരണങ്ങള്‍ക്ക് നന്ദി അറിയിച്ച് ഇന്ത്യ. കേന്ദ്ര വിദേശകാര്യ മന്ത്രി എസ് ജയശങ്കര്‍ ചൈനീസ് വിദേശ കാര്യ മന്ത്രിയെ ഫോണില്‍ വിളിച്ചാണ് നന്ദി അറിയിച്ചത്. കൊറോണ വൈറസ് നേരിടുന്നതില്‍ പരസ്പര സഹകരണം ഉറപ്പ് വരുത്തുമെന്ന് കേന്ദ്ര വിദേശകാര്യ മന്ത്രി എസ് ജയശങ്കര്‍ പറഞ്ഞു.

അതേസമയം, ചൈനയിലെ വുഹാനില്‍ കൊറോണ വൈറസ് ബാധയെ തുടര്‍ന്ന് കുടുങ്ങിയ ഇന്ത്യക്കാരുമായുള്ള ആദ്യ വിമാനം നാളെ പുലര്‍ച്ചെ ഡല്‍ഹിയിലെത്തും. കേന്ദ്ര വിദേശകാര്യ സഹമന്ത്രി വി മുരളീധരനാണ് ചൈനയില്‍ നിന്ന് ആദ്യ വിമാനം നാളെ എത്തുമെന്ന് സ്ഥിരീകരിച്ചത്. ചൈനയിലെ പരിശോധനയില്‍ രോഗബാധ ഇല്ലെന്ന് കണ്ടെത്തിയവരെയാണ് ഇപ്പോള്‍ മടക്കികൊണ്ടുവരുന്നത്. രോഗം ബാധിച്ചവരെയും തിരികെ കൊണ്ടുവരാന്‍ ശ്രമം തുടരുകയാണെന്ന് വി മുരളീധരന്‍ അറിയിച്ചു.

തിരിച്ചെത്തുന്നവരുടെ വൈദ്യ പരിശോധന ആരോഗ്യ വകുപ്പ് നടത്തും ചൈനയില്‍ കുടുങ്ങിയ 366 പേരെയാണ് നാളെ ഇന്ത്യയിലെത്തിക്കുക. തിരികെ കൊണ്ടുവരുന്നവരെ ഡല്‍ഹിയില്‍ തന്നെ താമസിപ്പിക്കും. ഇവരില്‍ രോഗ ലക്ഷണം കാണിക്കുന്നവരെ ആശുപത്രിയിലെ ഐസൊലേറ്റഡ് വാര്‍ഡിലേക്ക് മറ്റും. മറ്റുള്ളവരെ രണ്ടാഴ്ച നിരീക്ഷിച്ച ശേഷം വീണ്ടും പരിശോധന നടത്തും. രോഗമില്ലെന്ന് ഉറപ്പാക്കിയ ശേഷമേ നാട്ടിലേക്ക് തിരിച്ചയക്കൂ.