കൊല്ലത്ത് വെടിയുണ്ടകൾ കണ്ടെത്തിയ സംഭവം; കൂടുതൽ കേന്ദ്ര ഏജൻസികൾ അന്വേഷിക്കും

കൊല്ലം കുളത്തൂപ്പുഴയിൽ വെടിയുണ്ടകൾ കണ്ടെത്തിയ സംഭവംകൂടുതൽ കേന്ദ്ര ഏജൻസികൾ അന്വേഷിക്കും. സംഭവത്തിൽ മിലിട്ടറി ഇന്റലിജൻസിന്റെ അന്വേഷണം ആരംഭിച്ചിട്ടുണ്ട്. എൻഐഎ സംഘമെത്തിയും അന്വേഷണം നടത്തും.

വെടിയുണ്ടകൾ പാക് നിർമിതമെന്ന സൂചനകൾ പുറത്തുവന്നതിന് പിന്നാലെയാണ് കേസ് കേന്ദ്ര ഏജൻസികൾ കൂടി അന്വേഷിക്കുന്നത്. പിഒഎഫ് എന്ന് വെടിയുണ്ടകളിൽ രേഖപ്പെടുത്തിയിട്ടുണ്ട്. പാകിസ്താൻ ഓഡൻസ് ഫാക്ടറിയുടെ ചുരുക്കപ്പേരാണ് ഇത്. ഈ കണ്ടെത്തലാണ് പുതിയ സംശയങ്ങൾക്ക് വഴിവച്ചത്. പാക് സർക്കാർ നിയന്ത്രണത്തിലുള്ളതാണ് പിഒഎഫ്.

Read Also : കൊല്ലത്ത് കണ്ടെത്തിയ വെടിയുണ്ടകൾ പാകിസ്താൻ നിർമിതമെന്ന് സൂചന

1981, 1982 എന്നീ വർഷങ്ങളിൽ നിർമ്മിച്ചതാണ് വെടിയുണ്ടകൾ എന്ന് അന്വേഷണത്തിൽ കണ്ടെത്തി. 7. 62 എം എം വെടിയുണ്ടയാണ് ഉപേക്ഷിക്കപ്പെട്ട നിലയിൽ കണ്ടെത്തിയത്. ദീർഘദൂര ലക്ഷ്യസ്ഥാനത്തെത്താൻ കഴിയുന്നവയാണ് 7.62 എംഎം വെടിയുണ്ട.

ഇന്നലെ വൈകിട്ടോടെയാണ് കൊല്ലം കുളത്തൂപ്പുഴയിൽ തിരുവനന്തപുരം ചെങ്കോട്ട അന്തർ ദേശീയ പാതയിൽ കല്ലുവെട്ടാംകുഴി മുപ്പതടി പാലത്തിന് സമീപത്ത് നിന്ന് 14 വെടിയുണ്ടകൾ കണ്ടെടുത്തത്. നാട്ടുകാരാണ് മലയോര ഹൈവേയുടെ പണി നടക്കുന്ന ഭാഗത്ത് ഉപേക്ഷിക്കപ്പെട്ട നിലയിൽ വെടിയുണ്ടകൾ കണ്ടത്. തുടർന്ന് നാട്ടുകാർ പൊലീസിൽ വിവരം അറിയിക്കുകയായിരുന്നു. കുളത്തൂപ്പുഴ പൊലീസെത്തി വെടിയുണ്ടകൾ കസ്റ്റഡിയിലെടുക്കുകയായിരുന്നു. 10 വെടിയുണ്ടകൾ ബുള്ളറ്റ് കെയ്‌സിലും നാലെണ്ണം പുറത്തുമായിരുന്നു ഉള്ളത്.

Story Highlights- Cartridges, Bullets