കെഎസ്ആർടിസി പണിമുടക്കിനിടെ മരിച്ചയാളുടെ കുടുംബത്തിന് സഹായം നൽകും

തിരുവനന്തപുരത്ത് കെഎസ്ആർടിസി പണിമുടക്കിനിടെ കുഴഞ്ഞുവീണ് മരിച്ചയാളുടെ കുടുംബത്തിന് സഹായം നൽകുമെന്ന് മന്ത്രി കടകംപള്ളി സുരേന്ദ്രൻ. മുഖ്യമന്ത്രിയും ഗതാഗത മന്ത്രിയുമായും ചർച്ച ചെയ്ത് ഇക്കാര്യത്തിൽ തീരുമാനമെടുക്കുമെന്നും മന്ത്രി പറഞ്ഞു. കുഴഞ്ഞുവീണ് മരിച്ച സുരേന്ദ്രന്റെ വീട് സന്ദർശിച്ച ശേഷമാണ് മന്ത്രിയുടെ പ്രതികരണം.

സമരത്തിന്റെ പേരിൽ നടന്നത് വലിയ അക്രമമാണ്. കെഎസ്ആർടിസിക്കെതിരെ കർശന നടപടി സ്വീകരിക്കും. ബസുകൾ തലങ്ങും വിലങ്ങും ഇട്ട് പോയതിനാലാണ് ഒന്നും ചെയ്യാൻ സാധിക്കാതെ പോയത്. സമരക്കാർ ജനങ്ങളോട് യുദ്ധം പ്രഖ്യാപിക്കുകയായിരുന്നു. മര്യാദകേടാണ് നടന്നത്. കെഎസ്ആർടിസിയെ നിലനിർത്തുന്നതിന് ജനങ്ങളുടെ നികുതിപ്പണമാണുപയോഗിക്കുന്നത്. സമരത്തിന്റെ പേരിൽ അന്യായങ്ങൾ അനുവദിക്കില്ലെന്നും മന്ത്രി കൂട്ടിച്ചേർത്തു.

story highlights- kadakampally surendran, ksrtc, strike