ലൈഫ് മിഷൻ ഇടപാട്; സർക്കാർ ഉദ്യോഗസ്ഥർ പണം കൈപ്പറ്റിയതിന് തെളിവില്ലെന്ന് വിജിലൻസ്

life mission

വടക്കാഞ്ചേരി ലൈഫ് മിഷൻ ഇടപാടിൽ സർക്കാർ ഉദ്യോഗസ്ഥർ പണം കൈപ്പറ്റിയതിന് തെളിവില്ലെന്ന് വിജിലൻസിന്റെ പ്രാഥമിക നിഗമനം. സ്വപ്ന സുരേഷും സന്ദീപ് നായരും നാല് കോടിയിലധികം രൂപ കൈപ്പറ്റിയെന്നും വിജിലൻസ് സംഘം കണ്ടെത്തി. ഇവരുടെ സാമ്പത്തിക ഇടപാടുകൾ കണ്ടെത്താൻ വിജിലൻസ് ബാങ്കുകൾക്ക് നോട്ടീസ് നൽകി.

ലൈഫ് ക്രമക്കേടിൽ കരാർ കമ്പനികളും ലൈഫ് മിഷൻ ഉദ്യോഗസ്ഥരും ചേർന്ന് ക്രിമിനൽ ഗൂഢാലോചന നടത്തിയെന്ന് വിജിലൻസ് കോടതിയിൽ നൽകിയ എഫ്.ഐ.ആറിൽ പറഞ്ഞിരുന്നു. കൂടാതെ പ്രതികൾ സാമ്പത്തിക നേട്ടമുണ്ടാക്കിയെന്ന് പറഞ്ഞിരുന്നെങ്കിലും അഴിമതി നടത്തിയെന്ന് പരാമർശമുണ്ടായിരുന്നില്ല. ഇതിനു പിന്നാലെ നടത്തിയ അന്വേഷണത്തിലാണ് സർക്കാർ ഉദ്യോഗസ്ഥർ പണം കൈപ്പറ്റിയതിന് തെളിവില്ലെന്ന് വിജിലൻസ് കണ്ടെത്തിയത്. സെക്രട്ടേറിയറ്റിലെ തദ്ദേശ ഭരണ വിഭാഗത്തിൽ നിന്ന് ശേഖരിച്ച ഫയലുകളും ചില സ്വകാര്യ രേഖകളും പരിശോധിച്ചതിന്റെ അടിസ്ഥാനത്തിലാണ് വിജിലൻസ് വിലയിരുത്തൽ.

അതേസമയം സ്വപ്ന സുരേഷും സന്ദീപ് നായരും പണം കൈപ്പറ്റിയെന്നും വിജിലൻസ് കണ്ടെത്തിയിട്ടുണ്ട്. സ്വപ്ന സുരേഷ് 3 കോടി 60 ലക്ഷം രൂപയും സന്ദീപ് നായർ 60 ലക്ഷം രൂപയും കൈപ്പറ്റിയെന്നാണ് കണ്ടെത്തൽ. യു.എ.ഇ കോൺസുൽ ജനറലിനെന്ന പേരിലാണ് സ്വപ്ന പണം കൈപ്പറ്റിയതെന്നും വിജിലൻസ് അന്വേഷണ സംഘം സ്ഥിരീകരിക്കുന്നുണ്ട്. ഇവരുടെ സാമ്പത്തിക വിവരങ്ങളിൽ വിശദമായി അന്വേഷണത്തിനായി വിജിലൻസ് ബാങ്കുകൾക്ക് നോട്ടീസ് നൽകിയിട്ടുണ്ട്. മാത്രമല്ല ഐ ഫോൺ വിവാദവുമായി ബന്ധപ്പെട്ടുള്ള കാര്യങ്ങളും വിജിലൻസ് അന്വേഷണ സംഘത്തിന്റെ പരിഗണയിലുണ്ട്.

Story Highlights Life mission, Vigilance

നിങ്ങൾ അറിയാൻ ആഗ്രഹിക്കുന്ന വാർത്തകൾനിങ്ങളുടെ Facebook Feed ൽ 24 News
Top