ജലപീരങ്കിയും കണ്ണീർ വാതകവും പ്രയോ​ഗിച്ചു; നിരവധി തവണ മർദിച്ചു; പൊലീസിനെതിരെ വൈറൽ ചിത്രത്തിലെ കർഷകൻ

പൊലീസ് തന്നെ നിരവധി തവണ മർദിച്ചുവെന്ന് വ്യക്തമാക്കി സോഷ്യൽ മീഡിയയിൽ വൈറലായ ചിത്രത്തിലെ കർഷകൻ. പൊലീസ് തങ്ങൾക്കുമേൽ ജലപീരങ്കിയും കണ്ണീർ വാതകവും പ്രയോ​ഗിച്ചുവെന്ന് മർദനത്തിനിരയായ കർഷകൻ സുഖ്ദേവ് സിം​ഗ് പറഞ്ഞു. ലാത്തികൊണ്ട് തന്റെ ശരീരം മുഴുവൻ അടികിട്ടിയെന്നും സുഖ്ദേവ് സിം​ഗ് വിശദീകരിച്ചു. എൻ.ഡി.ടി.വിയോടായിരുന്നു സുഖ്ദേവ് സിം​ഗിന്റെ പ്രതികരണം.

കര്‍ഷകര്‍ക്കൊപ്പം പ്രതിഷേധിക്കുമ്പോഴും തന്നെ എന്തിനാണ് തല്ലിയതെന്ന് മനസിലായില്ല. പൊലീസിന് നേരെ കല്ലെറിയുകയോ മുദ്രാവാക്യം വിളിക്കുകയോ ഒന്നും താന്‍ ചെയ്തിട്ടില്ലെന്നും അദ്ദേഹം പറഞ്ഞു.

ഡൽഹിയിൽ നടന്ന കർഷക സമരത്തിനിടെ പൊലീസുകാരൻ സുഖ്ദേവ് സിം​ഗിനെ ലാത്തികൊണ്ടടിക്കുന്ന ചിത്രം സോഷ്യൽ മീഡിയയിൽ വൈറലായിരുന്നു. രാഷ്ട്രീയ നേതാക്കൾ അടക്കം നിരവധി പേർ ചിത്രം പങ്കുവച്ചിരുന്നു. എന്നാൽ സുഖ്ദേവ് സിം​ഗിന് യഥാർത്ഥത്തിൽ മർദനമേറ്റിട്ടില്ലെന്നായിരുന്നു ബിജെപിയുടെ ആരോപണം. നുണപ്രചാരണമാണ് നടക്കുന്നതെന്നും ബിജെപി പ്രവർത്തകർ പറഞ്ഞിരുന്നു. ഇതിനെ തള്ളുന്നതാണ് സുഖ്ദേവ് സിം​ഗിന്റെ പ്രസ്താവന.

Story Highlights – Farmer In Viral Image Says Hit Multiple Times By Cops