​ഗവർണറുടെ തീരുമാനം ​നിർഭാ​ഗ്യകരവും ജനാധിപത്യവിരുദ്ധവും; ഒറ്റക്കെട്ടായി വിമർശിച്ച് ഭരണപക്ഷവും പ്രതിപക്ഷവും

നിയമസഭാ സമ്മേളനത്തിന് അനുമതി നിഷേധിച്ച ​ഗവർ‌ണർ ആരിഫ് മുഹമ്മദ് ഖാന്റെ നടപടിയെ ഒറ്റക്കെട്ടായി വിമർശിച്ച് സർക്കാരും പ്രതിപക്ഷവും. ​ഗവർണറുടെ നടപടിക്കെതിരെ സ്പീക്കർ പി. ശ്രീരാമകൃഷ്ണൻ, മന്ത്രി വി.എസ് സുനിൽകുമാർ, പ്രതിപക്ഷ നേതാവ് രമേശ് ചെന്നിത്തല, സിപിഐ സംസ്ഥാന സെക്രട്ടറി കാനം രാജേന്ദ്രൻ, മുതിർന്ന കോൺ​ഗ്രസ് നേതാവ് കെ.സി ജോസഫ് ഉൾപ്പെടെയുള്ളവർ രം​ഗത്തെത്തി.

നടപടി അസാധാരണം: സ്പീക്കർ

​ഗവർണറുടെ നടപടി അസാധാരണമെന്നായി​രുന്നു സ്പീക്കർ പി ശ്രീരാമകൃഷ്ണന്റെ പ്രതികരണം. ​ഗവർണർ മന്ത്രിസഭയുടെ ഉപദേശം അനുസരിച്ച് പ്രവർത്തിക്കുകയാണ് വേണ്ടത്. സർക്കാർ നിയമവശങ്ങൾ പരിശോധിച്ച് നടപടി സ്വീകരിക്കണമെന്നും സ്പീക്കർ പറഞ്ഞു.

​ഗവർണറുടേത് ജനാധിപത്യ വിരുദ്ധ നടപടി: മന്ത്രി വി.എസ് സുനിൽകുമാർ

​ഗവർണറുടെ നടപടി ജനാധിപത്യ വിരുദ്ധമെന്ന് മന്ത്രി വി.എസ് സുനിൽകുമാർ. ഗവർണറുടേത് രാഷ്ട്രീയ തീരുമാനമെന്ന് കരുതേണ്ടി വരും. സാഹചര്യം എന്തായാലും ​ഗവർണർ നിയമസഭാ സമ്മേളനത്തിന് അനുമതി നൽകേണ്ടതായിരുന്നു. കേന്ദ്ര നിയമത്തിലെ വിയോജിപ്പ് നിയമസഭയ്ക്ക് അകത്ത് പ്രകടിപ്പിക്കാൻ അവകാശമുണ്ട്. സഭ കൂടേണ്ട അടിയന്തര സാഹചര്യമെന്താണെന്ന് മന്ത്രിസഭയാണ് തീരുമാനിക്കേണ്ടത്. മുഖ്യമന്ത്രിയുമായി ആലോചിച്ച് തുടർ നടപടി സ്വീകരിക്കും. ഗവർണറെ വീണ്ടും സമീപിക്കില്ലെന്നും മന്ത്രി പറഞ്ഞു.

തീരുമാനം നിർഭാ​ഗ്യകരം: പ്രതിപക്ഷ നേതാവ്

​​ഗവർണറുടെ തീരുമാനം നിർഭാ​ഗ്യകരമെന്ന് പ്രതിപക്ഷ നേതാവ് രമേശ് ചെന്നിത്തല. മെമ്പേഴ്സ് ലോഞ്ചിൽ സമ്മേളിച്ച് സഭാം​ഗങ്ങൾ പ്രമേയം പാസാക്കണം. ​ഗവർണറുടെ നടപടി ജനാധിപത്യ വിരുദ്ധമാണെന്നും രമേശ് ചെന്നിത്തല പറഞ്ഞു.

​ഗവർണർ കേന്ദ്രസർക്കാരിന്റെ ചട്ടുകമാകരുത്: കാനം രാജേന്ദ്രൻ

​ഗവർണർ ആരിഫ് മുഹമ്മദ് ഖാൻ കേന്ദ്രസർക്കാരിന്റെ ചട്ടുകമാകരുതെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ പറഞ്ഞു.

ഗവർണർ ബിജെപി വക്താവായി മാറി: കെ. സി ജോസഫ്

നിയമസഭാ സമ്മേളനത്തിന് അനുമതി നിഷേധിച്ച ​ഗവർണറുടെ നടപടി രാഷ്ട്രീയ പ്രേരിതമെന്ന് മുതിർന്ന കോൺ​ഗ്രസ് നേതാവ് കെ സി ജോസഫ്. ഗവർണറുടേത് വളരെ അസാധാരണമായ നടപടിയാണ്. കേരള ചരിത്രത്തിൽ ഇതിന് മുൻപ് ഇത്തരത്തിൽ ഒരു സംഭവം ഉണ്ടായിട്ടില്ല. ​ഗവർണർ‌ ബിജെപിയുടെ വക്താവായി മാറിയെന്നും കെ.സി ജോസഫ് പറഞ്ഞു.

നിയമസഭ വിളിച്ചുകൂട്ടുക എന്നത് മന്ത്രിസഭയുടെ അധികാരമാണ്. രാജ്യ തലസ്ഥാനത്ത് കർഷകരുടെ സമരം ആളിക്കത്തുമ്പോൾ വിഷയത്തിന് ​ഗൗരവമില്ല എന്ന് പറയുന്നത് ശരിയല്ല. ​ഗവർണർ നിലപാട് പുനഃപരിശോധിക്കണം. മന്ത്രിസഭയുടെ ശുപാർശ അനുസരിച്ച് നിയമസഭ വിളിച്ചുകൂട്ടാൻ നടപടി സ്വീകരിക്കണമെന്നും കെ.സി ജോസഫ് പറഞ്ഞു.

Story Highlights – Governor arif muhammad khan, Farm law

നിങ്ങൾ അറിയാൻ ആഗ്രഹിക്കുന്ന വാർത്തകൾനിങ്ങളുടെ Facebook Feed ൽ 24 News
Top