വിദേശത്തേക്ക് കടക്കാൻ ശ്രീലങ്കൻ വംശജർ കൊച്ചിയിൽ എത്തിയിരുന്നതായി സൂചന

വിദേശത്തേക്ക് കടക്കാൻ 20 ശ്രീലങ്കൻ വംശജർ കൊച്ചിയിൽ എത്തിയിരുന്നതായി സൂചന. ഏജന്റുമാർ പിടിയിലായെന്ന് അറിഞ്ഞതോടെ തെരഞ്ഞെടുപ്പിന്റെ തലേദിവസം ഇവർ കൊച്ചി വിട്ടതായാണ് വിവരം.

മുനമ്പം തീരം വഴി ബോട്ട് മാർഗം വിദേശ രാജ്യങ്ങളായ ഓസ്‌ട്രേലിയ, ന്യൂസിലാൻഡ്, സിംഗപ്പൂർ, മലേഷ്യ എന്നിവിടങ്ങളിലേക്കാണ് മനുഷ്യക്കടത്തിന് പദ്ധതിയിട്ടിരുന്നത്. ഇങ്ങനെ കടക്കാൻ ശ്രീലങ്കൻ പൗരന്മാരായ 20 പേർ കൊച്ചിയിൽ എത്തിയിരുന്നതായി പൊലീസിന് സൂചന ലഭിച്ചിരുന്നു. ഏജന്റുമാരെന്ന് സംശയിക്കുന്ന രണ്ട് പേരെ തൂത്തുക്കുടി പൊലീസ് കസ്റ്റഡിയിലെടുത്തതോടെ ഇവർ കൊച്ചി വിടുകയായിരുന്നു.
കൊച്ചിയിലെത്തിയവരെ കണ്ടെത്താനുള്ള ശ്രമം പൊലീസ് ഊർജിതമാക്കിയിട്ടുണ്ട്. 2019 ജനുവരി മാസത്തിൽ മുനമ്പത്ത് നിന്ന് കണ്ടെത്തിയ സംഘം തന്നെയാണ് ഇതിന് പിന്നിലെന്നും പൊലീസ് സംശയിക്കുന്നുണ്ട്.

അതേസമയം മുനമ്പം, ചെറായി, എടവനക്കാട് തുടങ്ങിയ സ്ഥലങ്ങളിലെ റിസോർട്ടുകളിൽ പൊലീസിന്റെ പരിശോധന തുടരുകയാണ്. മുൻപ് മനുഷ്യക്കടത്തിന് പ്രതികൾ തെരഞ്ഞെടുത്ത മാർഗങ്ങൾ പൊലീസ് പരിശോധിച്ചുവരികയാണ്.

Story Highlights: human trafficking