18
Jun 2021
Friday

വെള്ളത്തിന്‌ മുകളില്‍ ഒഴുകി നടക്കുന്ന ഗ്രാമങ്ങള്‍

ലോകമെങ്ങും നാഗരികതകൾ ഉത്ഭവിച്ചതും വികസിച്ചതും ജലാശയങ്ങള്‍ക്ക് ചുറ്റുമാണെന്ന് ചരിത്രം പറയുന്നു. കുടിവെള്ളം, വിളകളുടെ ജലസേചനം തുടങ്ങി വിവിധ ആവശ്യങ്ങൾ നിറവേറ്റേണ്ടിയിരുന്നതിനാല്‍ നദികള്‍ക്ക് ചുറ്റുമായി ജീവിക്കേണ്ടത് നൂറ്റാണ്ടുകള്‍ക്ക് മുന്‍പുള്ള ജനതയുടെ ആവശ്യമായിരുന്നു. എന്തിനേറെ, വാണിജ്യ സാധ്യതയും സുസ്ഥിരതയും ഉള്ള ജലാശയങ്ങൾക്ക് സമീപം നഗരങ്ങളും താമസ കേന്ദ്രങ്ങളും ഉയർന്നു വരുന്നത് ആധുനിക കാലങ്ങളിൽ പോലും കാണാനാവുന്ന കാഴ്ചയാണ്.

ജലാശയങ്ങള്‍ക്ക് ചുറ്റുമുള്ള കരഭാഗത്ത് വസിക്കുന്നതിനു പുറമേ, വെള്ളത്തിൽ വസിക്കുന്ന കമ്മ്യൂണിറ്റികളെയും ലോകമെമ്പാടും പലയിടങ്ങളിലും കാണാം. ഉൾനാടൻ ജലാശയങ്ങളുടെ ഉപരിതലത്തിലുള്ള ഈ വാസസ്ഥലങ്ങൾ ഫ്ലോട്ടിങ് വില്ലേജുകൾ അല്ലെങ്കിൽ ബോട്ട് കമ്മ്യൂണിറ്റികൾ എന്നറിയപ്പെടുന്നു. ലോകത്തിന്‍റെ വിവിധ കോണുകളില്‍ വംശീയവും തൊഴിൽപരവുമായ കാരണങ്ങളാൽ വികസിപ്പിക്കപ്പെട്ട ഇത്തരം ഫ്ലോട്ടിംഗ് വില്ലേജുകളില്‍ പലതും ഇന്ന് ഏറെ പ്രശസ്തമായ ടൂറിസ്റ്റ് കേന്ദ്രങ്ങള്‍ കൂടിയാണ്. ഇങ്ങനെ കൗതുകകരമായ ചില ഫ്ലോട്ടിംഗ് വില്ലേജുകളില്‍ ചിലത് പരിചയപ്പെടാം.

മോഗെന്‍, തായ്‍‍‍‍ലൻഡ്

തെക്ക് കിഴക്കൻ ഏഷ്യയ്ക്ക് ചുറ്റുമുള്ള ജലാശയങ്ങളില്‍ ബോട്ടുകളിൽ താമസിക്കുന്ന ഈ സമുദ്ര ജിപ്സികളാണ് 2005 ലെ സുനാമിക്കുശേഷമാണ് ഇവര്‍ ആദ്യമായി ലോകത്തിന്‍റെ ശ്രദ്ധയിൽ പെടുന്നത്. നാടോടികളായ ഈ സമൂഹം ബർമ, തായ്ലൻഡ്, മലേഷ്യ, ബോർണിയോ എന്നിവിടങ്ങളിലുള്ള ജലാശയങ്ങളിലാണ് വസിക്കുന്നത്. അതുല്യമായ ആചാരങ്ങളും പാരമ്പര്യങ്ങളും മാത്രമല്ല, ഇവരുടെ ഭാഷയും വ്യത്യസ്തമാണ്. ബോട്ടുകളിൽ തികച്ചും ലളിതമായ ജീവിതം നയിക്കുന്നവരാണ് ഇക്കൂട്ടർ.

ഇന്തോനേഷ്യയിലാണ് ഇക്കൂട്ടര്‍ ആദ്യമായി ഉണ്ടായതെന്ന് ചിലര്‍ വിശ്വസിക്കുന്നു. ഇന്ത്യയാണ് ഇവരുടെ ഉത്ഭവസ്ഥാനമെന്ന് വിശ്വസിക്കുന്നവരും ഉണ്ട്. ഇക്കൂട്ടര്‍ക്ക് പൗരത്വം നൽകാനുള്ള തായ് ഗവൺമെന്റിന്‍റെ ശ്രമത്തിന്‍റെ ഭാഗമായി, ഈ സമൂഹത്തിന്‍റെ പേര് ഔദ്യോഗികമായി തായ് മായ് എന്നാക്കി മാറ്റിയിരുന്നു.

ടോണ്‍ലി സാപ്, കംബോഡിയ

കംബോഡിയയിലെ ശുദ്ധജല തടാകങ്ങളിലൊന്നായ ടോൺലി സാപ്പിൽ നിരവധി ഫ്ലോട്ടിംഗ് വില്ലേജുകളുണ്ട്. ഓരോ സീസണിലും തടാകത്തിന്‍റെ വലുപ്പത്തിലുണ്ടാകുന്ന മാറ്റത്തിനനുസൃതമായി ഇവയുടെ എണ്ണവും വ്യത്യാസപ്പെടാം.

മഴക്കാലത്ത് ഏകദേശം 31,000 ചതുരശ്ര കിലോമീറ്റർ വിസ്തൃതി കണക്കാക്കുന്ന ഈ തടാകം ഏഷ്യയിലെ ഏറ്റവും വലിയ ശുദ്ധജല തടാകമായും ലോകത്തിലെ ഏറ്റവും വലിയ ശുദ്ധജല വെള്ളപ്പൊക്ക പ്രദേശമായും കണക്കാക്കപ്പെടുന്നു. തടാകത്തിന്‍റെ ഉയർന്ന പ്രദേശങ്ങളില്‍ 170 ഓളം ഫ്ലോട്ടിംഗ് വില്ലേജുകള്‍ ഉണ്ടെന്നാണ് കണക്കാക്കുന്നത്. 1997 ൽ ഐക്യരാഷ്ട്രസഭയുടെ ബയോസ്ഫിയർ പട്ടികയിൽ തടാകം ഇടം നേടിയിരുന്നു.

ഡേ-അസന്‍, ഫിലിപ്പീൻസ്

ഫിലിപ്പൈൻസിലെ സുരിഗാവോ സിറ്റിയിലാണ് ഡേ-അസൻ ഫ്ലോട്ടിംഗ് വില്ലേജ്. ജലാശയങ്ങള്‍ക്ക് മുകളില്‍ മരക്കാലുകളില്‍ പൊങ്ങി നില്‍ക്കുന്ന വീടുകള്‍ ഇവിടെ സാധാരണമാണ്. ഫിലിപ്പൈൻസിലെ ഒരു പ്രധാന മത്സ്യബന്ധന ഗ്രാമമായ ഇവിടെ ഏകദേശം 1, 800 ആളുകൾ താമസിക്കുന്നു എന്നാണു കണക്ക്.

‘സുരിഗാവോ നഗരത്തിലെ ലിറ്റിൽ വെനീസ്’ എന്നാണ് ഇവിടം അറിയപ്പെടുന്നത്. ആഴം കുറഞ്ഞ വെള്ളത്തിൽ തടി ഉറപ്പിച്ച്, അതിനു മുകളിലായോ പാറക്കൂട്ടങ്ങളിലോ വീടുകൾ നിർമ്മിക്കുന്നത് ഇവിടെ സാധാരണയാണ്. വീടുകള്‍ക്ക് പുറമേ, പൊതുയോഗങ്ങൾക്കായി പുരോക് സെന്‍ററുകൾ എന്നറിയപ്പെടുന്ന വില്ലേജ് മീറ്റിംഗ് ഹൌസുകളും ഗ്രാമത്തിലുണ്ട്.

യുറോസ്, പെറു

ലാറ്റിനമേരിക്കൻ രാജ്യമായ പെറുവിലെ ടിറ്റിക്കാക്ക തടാകത്തിലാണ് യുറോസ് ജനത വസിക്കുന്നത്. വെള്ളത്തിന്‌ മുകളില്‍ സ്വന്തമായി ഒഴുകും ദ്വീപുകള്‍ ഉണ്ടാക്കിയാണ് ഇവര്‍ ജീവിക്കുന്നത്. ഈ പ്രദേശത്ത് മാത്രം ലഭ്യമായതും ടോട്ടോറ എന്നറിയപ്പെടുന്നതുമായ ഒരു പ്രത്യേക തരം ജലസസ്യം ഉപയോഗിച്ചാണ് ഇവര്‍ ചെറിയ ദ്വീപുകള്‍ ഉണ്ടാക്കുന്നത്. പരമ്പരാഗത ജീവിതശൈലി പിന്തുടരുന്ന ഇവരുടെ വീടുകളില്‍ ടെലിവിഷനുകൾ, റേഡിയോകൾ തുടങ്ങിയ ആധുനിക സൗകര്യങ്ങളും കാണാം.

ഇൻകകൾ ഈ പ്രദേശങ്ങൾ കീഴടക്കുന്നതിനു വളരെ മുമ്പുതന്നെ യൂറോസ് സമൂഹം ഉത്ഭവിച്ചതായി കണക്കാക്കപ്പെടുന്നു, ഇൻകകളുടെ ആക്രമണത്തില്‍ നിന്നും രക്ഷപ്പെടാന്‍ വേണ്ടിയാണ് യൂറോസ് ജനത ഈ ജീവിതശൈലി തിരഞ്ഞെടുക്കാൻ നിർബന്ധിതരായതെന്നും വിശ്വസിക്കപ്പെടുന്നു. മത്സ്യബന്ധനം, ടൂറിസം എന്നിവയാണ് ഇവരുടെ ഇന്നത്തെ പ്രധാന ജീവിതമാർഗം.

ഗാൻവി, ആഫ്രിക്ക

ടോഫിനു വംശജരായ ആളുകള്‍ താമസിക്കുന്ന ഫ്ലോട്ടിംഗ് വില്ലേജാണ് ഗാന്‍വി. ആഫ്രിക്കയിലെ രാജ്യമായ ബെനിനിലാണ് ഇത് സ്ഥിതിചെയ്യുന്നത്. പതിനാറാം നൂറ്റാണ്ടിലാണ് ഈ ഗ്രാമത്തിന്‍റെ ഉദയം. ഇരുപതിനായിരത്തോളം ജനസംഖ്യയുള്ള ഈ ഗ്രാമത്തിൽ ഇപ്പോൾ സ്കൂൾ, ആശുപത്രി, ഫ്ലോട്ടിങ് ഷോപ്പുകൾ, വിനോദ സഞ്ചാരികള്‍ക്കായി ഒരു ഹോട്ടൽ എന്നിവയുണ്ട്. കയാക്കുകളാണ് പ്രധാന ഗതാഗത മാർഗം. മത്സ്യബന്ധനവും പഴങ്ങളുടെയും പച്ചക്കറികളുടെയും കച്ചവടവുമാണ് പ്രധാന വരുമാനം. ‘ആഫ്രിക്കയിലെ വെനീസ്’ എന്നറിയപ്പെടുന്ന ഗാൻവി ഇപ്പോൾ രാജ്യത്തെ ഏറ്റവും വലിയ തടാകഗ്രാമമാണ്.

ഹാലോംഗ് ബേ, വിയറ്റ്നാം

വിയറ്റ്നാമിലെ നാല് മത്സ്യബന്ധനഗ്രാമങ്ങൾ ഉൾക്കൊള്ളുന്ന ഫ്ലോട്ടിംഗ് വില്ലേജാണ് ഹാലോംഗ് ബേ. നാടോടിക്കഥകളില്‍ പറയുന്ന, ആക്രമണകാരികളില്‍ നിന്നും കടലിനെ സംരക്ഷിക്കുന്ന ഡ്രാഗണായ ഹാലോംഗിന്‍റെ പേരില്‍ നിന്നാണ് ഗ്രാമത്തിന് ആ പേര് ലഭിച്ചത്. ഒരുകാലത്ത്, മത്സ്യത്തൊഴിലാളികൾക്ക് മീൻ വിൽക്കാനുള്ള സ്ഥലമായിരുന്ന ഹാലോംഗ് ബേ പിന്നീട് ഒരു ഫ്ലോട്ടിങ് വില്ലേജായി മാറുകയായിരുന്നു. ക്യൂവ വാൻ, ബാ ഹാംഗ്, കോംഗ് സൊ, വോങ് വിയങ് എന്നിങ്ങനെ നാല് മത്സ്യബന്ധന ഗ്രാമങ്ങളിലായി ഇപ്പോൾ 1,600 ഓളം ആളുകൾ ഇവിടെ താമസിക്കുന്നുണ്ട്. മത്സ്യബന്ധനത്തിലൂടെയും സമുദ്ര അക്വാകൾച്ചറിലൂടെയുമാണ് ഇവര്‍ വരുമാനം കണ്ടെത്തുന്നത്. ഈ പ്രദേശത്തിന്‍റെ സാംസ്കാരിക പ്രസക്തി തിരിച്ചറിഞ്ഞ യുനെസ്കോ ഹാലോംഗ് ബേ പ്രദേശത്തെ ലോക പൈതൃക സൈറ്റായി പ്രഖ്യാപിച്ചു.

ആബർ‌ഡീൻ, ഹോങ്കോംഗ്

ഒരു കാലത്ത് ഒരു ഫ്ലോട്ടിംഗ് ഗ്രാമത്തിന്റെ അഭിവൃദ്ധി കേന്ദ്രമായിരുന്ന ഹോങ്കോങ്ങിലെ ഫ്ലോട്ടിംഗ് ഗ്രാമമായ ആബർ‌ഡീൻ ഇപ്പോൾ ഗണ്യമായി കുറഞ്ഞു. 600, 700 കളിൽ ഹോങ്കോങ്ങിലെത്തിയ ടാങ്ക എന്നറിയപ്പെടുന്ന ഒരു കൂട്ടം ആളുകളാണ് ഫ്ലോട്ടിംഗ് ഗ്രാമം സ്ഥാപിച്ചത്. ഈ പ്രദേശം ഒരു പ്രധാന തുറമുഖമെന്ന നിലയിൽ ഒരു പ്രധാന ചുവടുവെപ്പ് നടത്തിക്കൊണ്ടിരുന്നു. 1982 ൽ ഹോങ്കോങ്ങിലെ ഈ ബോട്ട് നിവാസികളുടെ മൊത്തം ജനസംഖ്യ 40,000 ആയി കണക്കാക്കപ്പെടുന്നു.

യാങ്‌വേ, മ്യാൻമർ

ഇൻ‌ലെ തടാകത്തിൽ സ്ഥിതിചെയ്യുന്ന ഫ്ലോട്ടിംഗ് ഗ്രാമമായ യാവ്‌ങ്‌വേയിൽ 17 കുഗ്രാമങ്ങളുണ്ട്, അതിൽ 70,000 ജനസംഖ്യയുണ്ട്. 116 കിലോമീറ്റർ വിസ്തീർണ്ണമുള്ള മ്യാൻമറിലെ രണ്ടാമത്തെ വലിയ തടാകമാണ് ഇൻലെ തടാകം. ഫ്ലോട്ടിംഗ് ഗ്രാമമായ യാങ്‌വേയിൽ, വീടുകൾ സ്റ്റിൽട്ടുകളിൽ നിർമ്മിക്കുകയും കയാക്കുകൾ ഗതാഗതത്തിനായി ഉപയോഗിക്കുകയും ചെയ്യുന്നു. മത്സ്യബന്ധനം ഗ്രാമത്തിലെ പ്രധാന പ്രവർത്തനമാണ്, അതേസമയം പച്ചക്കറികളും പഴങ്ങളും കച്ചവടം നടത്തുന്നു. നിലവിൽ, ഫ്ലോട്ടിംഗ് ഗ്രാമമായ യാങ്‌വേ രാജ്യത്തെ പ്രധാന വിനോദ സഞ്ചാര കേന്ദ്രമാണ്.

കൊവിഡ് പോരാട്ടത്തില്‍ അണിചേരുകയാണ് ഫ്‌ളവേഴ്‌സും ട്വന്റിഫോര്‍ ന്യൂസും
COVID WAR 24X7 എന്ന ക്യാമ്പെയിനിലൂടെ. ഇത് ഒരു യുദ്ധമാണ്. വിജയം മാത്രം ലക്ഷ്യംവെച്ചുകൊണ്ട് നമ്മള്‍ ഒരുമിച്ചു നയിക്കുന്ന യുദ്ധം.

Doctor In | Covid Warriors | Stay Home Creative Challenge | Perfect Ok Photography Award | Inspire The Idea Bank

നിങ്ങൾ അറിയാൻ ആഗ്രഹിക്കുന്ന വാർത്തകൾനിങ്ങളുടെ Facebook Feed ൽ 24 News
Top