മോദി-പിണറായി കൂടിക്കാഴ്ചയില്‍ കൊടകര മുങ്ങി; കൊടുക്കല്‍ വാങ്ങല്‍ ഇനിയും തുടരും; കെ. മുരളീധരന്‍

​മുഖ്യമന്ത്രി പിണറായി വിജയനും പ്രധാനമന്ത്രി നരേന്ദ്ര മോദിയും തമ്മില്‍ നടത്തിയ കൂടിക്കാഴ്ച കേരളത്തിലെ ബി.ജെ.പിക്ക്​ ഏറെ ഗുണമുണ്ടായതായി കെ. മുരളീധരന്‍ എം.പി. കൊടകര കുഴല്‍പണക്കേസ്​ ഈ കൂടിക്കാഴ്ചയില്‍ മുങ്ങിപ്പോയതായി ട്വിറ്ററില്‍ മുരളി കുറിച്ചു. കൊടകര കുഴല്‍പണക്കേസില്‍ ബി.ജെ.പി നേതാക്കള്‍ പ്രതികളല്ലെന്ന്​ കുറ്റപത്രം പുറത്തുവന്നതിന്​ പിന്നാലെയാണ്​ മുരളിയുടെ ട്വീറ്റ്​​.

ബി.ജെ.പി സംസ്​ഥാന പ്രസിഡന്‍റ്​ കെ. സുരേന്ദ്രന്‍ വെറുതെയല്ല വെല്ലുവിളി നടത്തിയതെന്നും മുരളി ചൂണ്ടിക്കാട്ടി. സി.പി.എമ്മും ബി.ജെ.പിയും തമ്മിലുള്ള കൊടുക്കല്‍ വാങ്ങല്‍ ഇനിയും തുടരും. ആയങ്കിമാരും തില്ല​ങ്കേരിമാരും കേസുകളില്‍നിന്ന്​ നൈസായിട്ട്​ ഊരുമെന്നും മുരളി പറഞ്ഞു.

‘ഈ കൂടിക്കാഴ്ച വഴി കേരളത്തിലെ ബി.ജെ.പിക്ക് ഉണ്ടായ ഗുണം ചെറുതല്ല. കൊടകര മുങ്ങി. സുരേന്ദ്രന്‍ വെറുതെയല്ല വെല്ലുവിളിച്ചത്. കൊടുക്കല്‍ വാങ്ങല്‍ തുടരും. ഇനി ആയങ്കിമാരും തില്ലങ്കേരിമാരും നൈസായിട്ട് ഊരും. കാത്തിരുന്നു കാണാം.’ -മുരളിയുടെ ട്വീറ്റ്​ ഇതായിരുന്നു.