ജിങ്കൻ ക്രൊയേഷ്യൻ ക്ലബിലേക്കെന്ന് സൂചന

മുൻ കേരള ബ്ലാസ്റ്റേഴ്സ് ക്യാപ്റ്റനും നിലവിൽ എടികെ മോഹൻബഗാൻ താരവുമായ ഇന്ത്യൻ പ്രതിരോധ താരം സന്ദേശ് ജിങ്കൻ ക്രൊയേഷ്യയിലേക്കെന്ന് സൂചന. ക്രൊയേഷ്യൻ മുൻനിര ക്ലബ് എച്ച്എൻകെ സിബേനിക്ക് താരവുമായി ഉടൻ കരാർ ഒപ്പിടുമെന്നാണ് വിവരം. ക്ലബും ജിങ്കനും തമ്മിലുള്ള ചർച്ചകൾ അവസാനിച്ചു. ഇരുവരും തമ്മിൽ ധാരണയായിക്കഴിഞ്ഞു. ഇനി ക്രൊയേഷ്യയിൽ കളിക്കുന്നതിനുള്ള വീസ അടക്കമുള്ള സാങ്കേതിക കാര്യങ്ങൾ മാത്രമാണ് ബാക്കിയുള്ളത്. അത് പൂർത്തിയായാൽ ഇന്ത്യൻ താരം ക്രൊയേഷ്യയിലേക്ക് പറക്കുമെന്നും റിപ്പോർട്ടുകൾ സൂചിപ്പിക്കുന്നു. (sandesh jhingan croatian club)

ഓൾ ഇന്ത്യ ഫുട്ബോൾ ഫെഡറേഷൻ്റെ 2020-21 സീസണിലേക്കുള്ള പുരസ്കാരങ്ങളിൽ സന്ദേശ് ജിങ്കൻ മികച്ച പുരുഷ താരവും സ്കോട്ടിഷ് ക്ലബായ റേഞ്ചേഴ്സിൽ കളിക്കുന്ന ബാല ദേവി മികച്ച വനിതാ താരവുമായി തെരഞ്ഞെടുക്കപ്പെട്ടിരുന്നു. ജിങ്കൻ ആദ്യമാണ് ഈ പുരസ്കാരം സ്വന്തമാക്കുന്നത്. 2014ൽ കേരള ബ്ലാസ്റ്റേഴ്സിൽ കളിച്ചിരുന്ന സമയത്ത് എമർജിങ് താരമായി ജിങ്കൻ തെരഞ്ഞെടുക്കപ്പെട്ടിരുന്നു. അതേസമയം, ബാല ദേവി ഇത് മൂന്നാം തവണയാണ് മികച്ച താരമായി തിരഞ്ഞെടുക്കപ്പെടുന്നത്. 204-15 സീസണുകളിൽ ബാല ദേവി ആയിരുന്നു മികച്ച വനിതാ താരം.

Read Also:ശ്രീ സിമന്റ്സുമായി കരാർ ഒപ്പിടാൻ വിസമ്മതിച്ച് ഈസ്റ്റ് ബംഗാൾ; ഐഎസ്എലിൽ നിന്ന് പുറത്താവാൻ സാധ്യത

ബെംഗളൂരു എഫ്സിയുടെ സുരേഷ് വാങ്‌ജം ആണ് പുരുഷ യുവതാരം. 20കാരനായ താരം ഇക്കൊല്ലം ഇന്ത്യക്കായി അരങ്ങേറിയിരുന്നു. മനീഷ കല്യാൺ ആണ് മികച്ച വനിതാ യുവതാരം. 19കാരിയായ താരം ഗോകുലം കേരളയിലാണ് കളിക്കുന്നത്.

അതേസമയം, വരുന്ന സീസണിലും ഐഎസ്എൽ ഗോവയിൽ തന്നെ നടന്നേക്കും എന്നാണ് റിപ്പോർട്ട്. രാജ്യത്തെ കൊവിഡ് വ്യാപനം പരിഗണിച്ച് ഒരു സ്ഥലത്ത് തന്നെ ഇത്തവണയും ഐഎസ്എൽ നടത്തിയേക്കുമെന്നാണ് റിപ്പോർട്ട്. കഴിഞ്ഞ സീസൺ ഗോവയിലാണ് നടത്തിയത്. ലീഗ് വിജയകരമായിരുന്നു. അതുകൊണ്ട് തന്നെ ഇത്തവണയും മത്സരങ്ങൾ ഗോവയിൽ തന്നെ നടക്കുമെന്ന് സൂചനയുണ്ട്. ഗോവയ്ക്കൊപ്പം കൊൽക്കത്തയും സംഘാടകർ പരിഗണിക്കുന്നുണ്ട്.

ഗോവയിലെ മൂന്ന് സ്റ്റേഡിയങ്ങളിലായാണ് കഴിഞ്ഞ സീസൺ ഐഎസ്എൽ നടത്തിയത്. സീസണിൽ മുംബൈ സിറ്റി എഫ്സി സീസൺ ഡബിൾ നേടിയിരുന്നു. ലീഗ് ഘട്ടത്തിൽ ഒന്നാമതെത്തി ഐഎസ്എൽ ഷീൽഡ് സ്ന്തമാക്കിയ ഐലാൻഡേഴ്സ് ഫൈനലിൽ വിജയിച്ച് ഐഎസ്എൽ കിരീടവും സ്വന്തമാക്കിയിരുന്നു.

Story Highlight: sandesh jhingan croatian club