ഐപിഎൽ: പുതിയ ടീമുകളെ അദാനിയും ആർപിജി ഗ്രൂപ്പും സ്വന്തമാക്കിയേക്കുമെന്ന് സൂചന

അടുത്ത സീസൺ ഐപിഎലിലെ പുതിയ രണ്ട് ടീമുകൾ അദാനി ഗ്രൂപ്പും ആർപിജി ഗ്രൂപ്പും സ്വന്തമാക്കിയേക്കുമെന്ന് സൂചന. ശതകോടീശ്വരനായ അദാനിക്ക് നേരത്തെ ക്രിക്കറ്റിൽ താത്പര്യമുണ്ടായിരുന്നു. അതേസമയം, മുൻപ് റൈസിംഗ് പൂനെ സൂപ്പർ ജയൻ്റിൻ്റെ ഉടമസ്ഥനായിരുന്ന സഞ്ജീവ് ഗോയങ്ക വീണ്ടും ഒരു ടീം സ്വന്തമാക്കാൻ കച്ചകെട്ടി ഇറങ്ങിയിട്ടുണ്ടെന്നാണ് സൂചന. അതുകൊണ്ട് തന്നെ അദാനി, ആർപിജി ഗ്രൂപ്പുകൾ തന്നെ പുതിയ ഐപിഎൽ ടീമുകളെ സ്വന്തമാക്കാനാണ് സാധ്യത. (adani rpg group ipl)

അഹ്മദാബാദ് ആസ്ഥാനമാക്കിയുള്ള ഫ്രാഞ്ചൈസിയെയാവും അദാനി ഗ്രൂപ്പ് സ്വന്തമാക്കുക. ലോകത്തിലെ ഏറ്റവും വലിയ സ്റ്റേഡിയമായ അഹ്മദാബാദിലെ നരേന്ദ്രമോദി സ്റ്റേഡിയം ടീമിൻ്റെ ഹോം ഗ്രൗണ്ടാവും. സഞ്ജീവ് ഗോയങ്കയുടെ ആർപിജി ഗ്രൂപ്പ് ലക്നൗ ആസ്ഥാനമാക്കിയുള്ള ഫ്രാഞ്ചൈസിക്കായാണ് ശ്രമിക്കുന്നത്.

പുതിയ രണ്ട് ടീമുകൾക്കായുള്ള ലേലം അടുത്ത മാസം നടക്കും. ഒക്ടോബർ 17ന് ലേലം നടക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. ഒക്ടോബർ 15നാണ് ഐപിഎൽ ഫൈനൽ. യുഎഇയിലെ ദുബായിലോ മസ്കറ്റിലോ വച്ച് ലേലം നടക്കും. നിലവിൽ 8 ടീമുകളാണ് ഐപിഎലിൽ ഉള്ളത്. 2 ടീമുകൾ കൂടി കൂട്ടിച്ചേർക്കപ്പെടുന്നതോടെ ആകെ ടീമുകൾ 10 ആകും.

Read Also : ഐപിഎൽ: പുതിയ ടീമുകൾക്കായുള്ള ലേലം അടുത്ത മാസം

അടുത്ത വർഷത്തെ ഐപിഎൽ ഗ്രൂപ്പ് മാതൃകയിൽ നടത്തുമെന്നാണ് റിപ്പോർട്ട്. 2 ടീമുകൾ കൂടി വർധിക്കുന്നതിനാൽ റൗണ്ട് റോബിൻ രീതിയിൽ നടത്തിയാൽ ടൂർണമെൻ്റിൻ്റെ ദൈർഘ്യം വർധിക്കുമെന്നും അതിനാൽ ടീമുകളെ രണ്ട് ഗ്രൂപ്പുകളാക്കി തിരിച്ച് ടൂർണമെൻ്റ് നടത്തുമെന്നും ബിസിസിഐ പ്രതിനിധിയെ ഉദ്ധരിച്ച് ക്രിക്ക്‌ബസ് റിപ്പോർട്ട് ചെയ്തു. കേരളത്തിൽ നിന്നുള്ള ഐപിഎൽ ടീമായ കൊച്ചി ടസ്കേഴ്സ് കേരള കൂടി കളിച്ചിരുന്ന 2011ലെ ടൂർണമെൻ്റ് ഗ്രൂപ്പ് മാതൃകയിലായിരുന്നു. അക്കൊല്ലം 10 ടീമുകൾ ഐപിഎൽ കളിച്ചിരുന്നു.

5 ടീമുകൾ വീതമുള്ള രണ്ട് ഗ്രൂപ്പുകളായി ടീമുകളെ തിരിക്കും. അതാത് ഗ്രൂപ്പുകളിലെ ടീമുകൾ തമ്മിൽ ഹോം, എവേ മത്സരങ്ങളും എതിർ ഗ്രൂപ്പിലെ എല്ലാ ടീമുകളുമായി ഓരോ മത്സരങ്ങളും കളിക്കും. എതിർ ഗ്രൂപ്പിലെ ഒരു ടീമിനെതിരെ മാത്രം ഹോം, എവേ മത്സരങ്ങളുണ്ടാവും. ഇതോടെ ഒരു ടീം ഗ്രൂപ്പ് ഘട്ടത്തിൽ 14 മത്സരങ്ങൾ കളിക്കും. ആകെ 74 ഗ്രൂപ്പ് മത്സരങ്ങൾ. തുടർന്ന് നോക്കൗട്ട് ഘട്ട പോരാട്ടങ്ങൾ നടക്കും.

Story Highlight: adani rpg group ipl teams